Nongpoh, Nohprah 22 : Kum ka jingdon bynta lem bad kiba bun ki longiing ba duk ba rangli ha shuwa ban poi ka sngi lehkmen Khristmas kaba dei ka sngi ka jingwan longbriew jong u khyllung Jisu Khrist sha kane ka pyrthei, ka Hynñiewtrep National Youth Front (HNYF) Nongpoh Circle mynta ka sngi kala sam da ki jaiñ kup syaid sha kumba 75 tylli ki longiing ba duk ba rangli jong ki shnong ka thaiñ Nongpoh.
Ha katei ka jingsam ïa kitei ki jaiñ kup syaid la wan ruh ban don ryngkat da u Bah Sylvester Mynsong Rangbah Shnong ka Nongpoh Proper kum u kongsan haka jingdonlang u Bah Marcus Marten President ka HNYF Northern Region, Bah Edilbert Nongrum Secretary, Bah Robert Thabah President ka Nongpoh Circle, Bah Fullbok Lyngdoh Secretary bad kiwei kiwei ki riew rangbah.
Haba kren ha katei ka sngi naka liang u Bah Silvester Mynsong u la ai ka jingïaroh ïaka seng HNYF kaba la shim ïaka sienjam ban sam ïa kitei ki jaiñ kup syaid sha ki longiing kiba donkam ka jingïarap khamtam ba kin ioh pdiang kum ka jingai sngewbha Khristmas, ryngkat ka khubor jingsuk ban wanrah ka jingïa ïeid mar kylliang.
U Bah Marcus Marten kum u President u la pynpaw ba kum ka seng kala shim ïa katei ka sienjam ban don bynta lem bad ki longiing baduk ka thaiñ Nongpoh watla ka dei ka jingai kaba rit jong ka seng, hynrei ai ba katei ka jingai sngewbha kan wanrah ka jingkmen bad ka jingkyrmen ïakitei ki longiing kiba duk ba rangli.
