Shillong, Ïaïong 17 : Ka Umphyrnai SC ka la khur ïa ka nam jop ha ka lympung ïalehkai Under-10 (boys) Football League 2023 ba pynïaid da ka Shillong Sports Association (SSA) da kaba pynbam da shiteng dorjon (6-0 kol) pyrshah ïa ka Challenger FT Academy,
Ha ka jingïalehkai ha ka sngi Nyngkong ha madan Polo, ka jingïalehkai hapdeng kitei ki ar tylli ki team ka jingïalehkai ka kham lah shilliang ha kaba ki khynnah ïalehkai ka Umphyrnai SC ki la tur naphang sha ka kut jong ka Challenger naduh kaba sdang ka jingïalehkai.
Ka Umphyrnai SC ka la ïoh ban pynkhih jar tang ha ka jingïalehkai ba dang ïaid 4 minit lyngba u D. Kharkongor uba la thep lai kol. Ïa ki ar kol u D. Kharkongor u la thep ha ka minit (18,47min). Ïa ki lai kol la ïarap thep da u E. Kharkongor (27,45minit) bad u A. Kharkongor (49minit).
Lyngba katei ka nam jop ka Umphyrnai SC ka la khur pura ïa ki lai point, katba ka Challenger FT Academy watla ki la ïakhun tyngeh ki khlem ïoh ban pynphai kol bad madan noh ka nam rem.
Ka jingïalehkai Under-10 (Boys) Football League 2023 kaban long mynta ka sngi Ba ar kan long hapdeng ka Sohryngkham SC pyrshah ïa ka Madanryting SC kaban long ha ka por 4:15 baje janmiet.
