Shillong, Ïaïong 17 : Ki 6 tylli ki College, ka nongbah ki la poi ban ïashim bynta sha ka lympung ïakob ïalehkai baksketball ba la tip ïa ka kum ka Seng Khasi College Invitational Basketball (Girls) Competition, kaba la long ha madan ïalehkai basketball jong kane ka college ha Weiking, Jaiaw, Shillong. Ïa kane ka jingïakob la sdang ïa ka hynne ka sngi ka 17 tarik u Ïaïong 2023, ïa kaba la plie ïa ka da u Principal ka Seng Khasi College u Bah W.B Rynjah.
Ki College kiba la wan ban ïashim bynta ki long ka Seng Khasi College, St Edmunds College, St.Mary’s College, Shillong Commerce, Synod College bad ka Lady Keane College.
Haba kren kum u kongsan, na ka liang u Bah W.B Rynjah, u la ong ba ka jingpynlong ïa kane ka lympung ka long kum shi bynta ka jingrakhe ka Seng Khasi College ïa ka jubili ksiar (Golden Gubilee), ha kaba kum ka college ka la shim ïa ka sien jam ba kan pynlong ïa kiba bun bah ki prokram.
Nalor katta u Principal um lah ban khlem da ai khublei ïa ki Principal jong ki college kiba la pdiang ïa kane ka jingwer ban ïashim bynta ka Seng Khasi College sha kane ka lympung ïalehkai basketball ïa ki khynnah kynthei, namar lymda kloi ban ïashim bynta lang jong ki, lehse ka jingpynlong ïa kane ka jingïakob kan nym long kaba jop.
Haba phai sha ki samla ba ïalehkai, u Principal u la kyntu ïa ki samla pule ba kin ïakhun tyngeh bad kynmmaw ba dei ban don ka mynsiem ban burom ïa ka jingïalehkai, da kaba u la ai syndon da ka nuksa ba haduh katno u dap bad shlei ka mynsiem haba u shem bad ïohi ba u khun jong uwei na ki khlur ïalehkai bna nam ïa ka kriket ka India u Sachin Tendulkar, u Arjun Tendulkar, uba la ïoh ban ïalehkai ha ka lympung ka Indian Premier League da kaba mihkhmat ïa ka kynhun ïalehkai jong ka Mumbai Indians.
Hangne u Principal u la ïeng ban pynkynmaw ïa ki khynnah nongwan ïashim bynta sha kane ka lympung ïalehkai basketball ïa ki kyntien phira bad kyntu kynpham ba u Sachin u la ai ha la u jong u khun “Give the game the respect it deserves and the game will love you back”.
Haba phai pat sha ki resol ha ka jingïakhun ba sdang, ka Seng Khasi College ka la lah ba kan pynliem ïa ka Shillong Commerce College da 30-11, ka St Edmund’s College ka la lah ba kan pynliem noh ïa ka Synod College da 26-14 katba ka St Mary’s College ka la lah ba kan pynliem ïa ka Lady Keane College da 17-9.
Mynta ka sngi Ba ar pat ki jingïakhun kin long St Anthony’s College pyrshah ïa ka St mary’s College bad ka Seng Khasi College kan ïakhun pyrshah ïa ka St Edmund’s College. Ka phainal jong kane ka lympung ïalehkai la buh ban pynlong ïa ka ha ka sngi Balang kata ha ka 19 tarik u Ïaïong 2023.
