Ka ishu halor ka Reservation Policy bad ka Roster System ka la khluit biang tar hadien ka jingpynkhih ki MLA ka Seng VPP ha Assembly bad khamtam hadien ba kane ka Seng kam shym la ïoh lad ban ïakren sani bha ïa kane ka kam lyngba ka Motion ba la wanrah ha ka Budget Session, hynrei la shu ïoh kren tiak da u Bah Ardent Basaïawmoit ha ka por ba u ïashim bynta ha ka jingïatai ïa ka Budget. Hadien kane ka VPP ka la pynbna ba kan leit sha u paidbah ban pan jingkyrshan namar ka jingbym ioh lad ban ïakren ïa kane ka mat ha Assembly. Nalorkata ka la ai jingthoh ruh sha u Myntri Rangbah u Conrad Sangma ban dawa ban khot da ka Special Session ban ïakren ïaka Roster System bad ka Reservation Policy.
Hadien kane ka jingleh ka Seng VPP, la khih puk ka Rilum Garo, haba ki Seng bapher bapher kila pynpaw ka jingbitar bad ka jingpyrshah kaba jur ïa kane ka jingpynkhih ka VPP ïa ka Policy bad ka System. Kiba bun ki Seng na Garo Hills ki la dawa ba ym dei ban pynkhih ïa ka Reservation bad pynneh beit ïa ka Roster naduh u snem 1972 kumba la pyntreikam da ka sorkar kumba la pyntreikam da ka sorkar. Ki don kiba la leit ruh da ka PIL sha ka ïingbishar halor ka jingpyntreikam ïa ka Roster da kaba dawa ban pyntreikam beit naduh u 1972.
Hynrei na ka liang ka ïingbishar kala pynmih ïa ka hukum da kaba ong ba kam shym la bthah ïa ka sorkar ban pyntreikam naduh lano yn sdang pyntreikam ïa ka Roster System, hynrei ka la shim kam da kaba bthah ba ka sorkar kadei ban don ka Roster System ha ka Reservation Policy, namar ba ka Reservation ha Meghalaya kam shym la don ka Roster naduh ba la pyntreikam ïa ka, kata naduh u 1972.
Ki la mih ruh ki jingkren bad ki jingpynpaw ba kane ka jingleh ka VPP kan wanrah ïa ka jingïasngewpher jaidbynriew hapdeng ki Khasi bad ki Garo. Ki don ruh kiba la pynpaw ba kane ka jingleh ka VPP kan wanrah ka jingtuklar na ka liang ka ïingbishar bad kan poi pynban sha ka jingduhnong ki trai ri trai muluk. Hynrei ka VPP kumba la kren da u President ha Assembly ba ka VPP haba ka shim ïa kane ka kam kam don jingthmu eiei ban wanrah ka jingïasngewpher jaidbynriew, hynrei ka dei beit thik tang halor ka jingnoh shiliang jong ka bad ban pynïoh ïa ka hok jong kawei pat ka kynhun jaidbynriew kaba la duhnong palat na kane ka Policy. U la da kyntu ruh ïa baroh ban da pyndonkam da ki kyntien ki ban nym ktah ïa ka jingsngewpher jaidbynriew bad ban da phikir bha ruh halor ka jingbuh ïa ki kyntien.
Wat ha ka jingïalang kaba la long ha sngi nyngkong ha Mawlai, kaba long ka jingïalang kaba nyngkong eh ban pynshai halor ki artylli ki mat, u Bah Ardent u la ïai ban ba kane ka jingpynkhih ïa ka Reservation bad ka Roster kam dei satia pyrshah ïa ki paralok Garo, hynrei kadei beit pyrshah ïa ka sorkar. U la ong ruh ba lada ka sorkar ka pdiang ïaka jingai jingmut jong ka VPP kum ka jingdawa ban buh ha ka Reservataion ïa ka bhah kyrpang na ka bynta ki briew kiba don jingduna ki dkhot met, wat ki paralok na Garo Hills ruh kin myntoi.
Ha kajuh ka sngi la iohi ruh ba u Myntri Rangbah ka jylla, u Conrad Sangma haba kren halor ka Reservation Policy bad ka Roster System, u la ong ba haba la ktah ïa ka ishu jong ka Reservation kan wanrah beit ka jingsngew pher jaidbynriew, hynrei u la ong ba kam dei pat kaba bakla bad kam lei lei namar ka ju jia hi kumne, ha kaba u la ong ba wat ha Karnataka ruh kaba kum kane ka jingsngew ka don. Hynrei u la ong ba ka shong ha ka jingïamir jingmut lang ban weng ïa kane ka jingeh na ka bynta ka jingmyntoi lang jong baroh.
Kumta na kine ki jingkren jong kine ki arngut ki nongïalam, ka paw ba ka Reservation Policy bad ka Roster System kidei ki mat ban ïakren bad kim lei lei lada ïakren wat lada ka don ka jingsngew ha kiba bun. Kumba ki la pynpaw ba lada ïashong lang na baroh ki kynhun kane ka kam lah ban weng noh syndon ïa ki sohkyrdot kiba don ha ka ban ïa kaba ieh ba kan shu kyan sah napoh napoh.
