Pynhap pyrda ka Nongsynrieh School Sports Association ïa ka ASM 2023 ba ar sngi ha Nongsynrieh

Mawkyrwat, Ïaïong 17: Ka Nongsynrieh School Sports Association kaba dei ka kynhun kaba teh-song-lang ha kawei ka shatri ïa ki lai tylli ki skul mynta ka sngi ka la ïoh ban pynhap pyrda noh ïa ka Annual Sports Meet (ASM) 2023 ba ar sngi ba la pynlong ha madan Shnong Nongsynrieh, South West Khasi Hills District.
Lah ban kdew ba ki khynnah skul ha ki ar sngi ki la ïoh ban ïashimbynta shit rhem bha da kaba ki la lah ban pyni ïa la ki jong ki sap ki phong la ka long ha ki ïa kop mareh naduh ka 100, 200, 400, 800, 1500, ka Relay Race bad kiwei kiwei ki jait jingïamareh, ki jingïakop rynsit (Long Jump bad High Jump), bad kiwei de ki jait jingïalehkai ba la pynbeit kyrpang da ki nonghikai. Kumjuh ruh ki khynnah skul ki la ïoh ban pyni ïa ka march pass bad mass drill kaba itynnad bad pynshoh biej ïa ki nongwan peit kai bad ïa ki riew rangbah kiba la wan sakhi.
U bah Synshar Lyngkhoi haba kren kum u kongsan ha ka sngi pynkut ïa ka Annual Sports Meet (ASM) 2023 u la ong ba ka mynsiem jong ka jingïatreilang hapdeng ki lai tylli ki skul kata naduh ki nonghikai, ki khynnah skul bad ki nongpynïaid ban pynlong kawei ka kynhun ha ki jingïalehkai sports ka la long pynban ka nuksa ba bha ïa kiwei. U la ban jur ruh ba da ka jingïatreilang, lah ban thom ïa ki jingeh kiba bun la ka long lyngba ka jingai jingshakri ha ka liang ka pule puthi ïa ki khynnah skul bad kumjuh ruh ba ki khynnah skul ruh kin long ka lawei ba phyrnai na ka bynta ka ïing ka sem, ka skul, ka shnong ka thaw, ka ri bad ka jaidbynriew lyngba ka jinglong ba bha ha ka akor ka burom bad long kiba minot thop ruh ha ki jingpule.
Haba kren ai mynsiem na ka bynta ki khynnah skul, u bah Synshar Lyngkhoi u la ong ba kum ki khynnah skul ki dei ban buh ha ka jingim jong ki ïa ka mynsiem jong ka jingïakop namar ki im ha kine ki sngi jong ka jingïapyni ïa ka jinglah ne competition ha ki bynta bapher bapher bad lada u khynnah skul um don ïa kata ka mynsiem u long jai-tuh ha kiei kiei baroh khamtam eh ban pule kot. Ha kajuh ka por ki dei ban don ka mynsiem bishni paralok ym na kino kino ki daw hynrei long bishni lada u paralok jong ki u kham lah ha ki jingpule bad kham lah lada sha kylli jingkylli ki nonghikai. “Buh ïa kata ka mynsiem jingbishni hynrei kim dei pat ban don ka mynsiem ba kin leit ban shoh leit dat da ka kti hynrei kin shoh da ka jabieng lyngba ka jingbuh ïa ka mynsiem jong ka jingïakhun, jingtrei shitom ha ki jingpule bad buh ruh ïa ki kyntien ba lada kiwei ki lah ma nga ruh nga dei ban lah”, ai mynsiem u bah Synshar ïa ki khynnah skul.
U bah Staising Kharbteng, Sub-Inspector of School hapoh ka ophis jong ka Sub Divisional of School Education Officer (SDSEO) u la ai khublei ïa ka jingïatreilang jong ki lai tylli ki skul ban pynlong kawei ka lama ha ka ban pynlong ïa ka kane ka Annual Sports Meet. Namarkata, u la ong ba ki jingïalehkai ki long kawei ka lad bad ka ïarap ban pynpalei bad pynproh ïa ka jingmut jingpyrkhat, kin ïoh ka met ka phad kaba koit ba khiah bad kin long khlaiñ, ban lait na ki jingpang kiba bun jait bad ban don ka jingïatreilang ryngkat ka jingïatylli bad kum juh ruh ka ïarap ïa ki khynnah skul ba kin sei ïa kita ki sap ki phong ha ki bynta bapher bapher bad kan long ryntih ha kiei kiei ne discipline da kaba kin long ki khynnah skul kiba nang ban bate ïa ka por.
Ha ka jingkren jong u u la ai jingmut ïa ki khynnah skul ba hadien kane ka jingïalehkai ma ki baroh kin sa phai biang ban bteng ïa ki jingpule ïa ka kot, kumta wat ai ba ka mobile phone, ne ki kam ki bym ler kam kan tuh noh ïa ka por jong ka jingpule jong ki hynrei kum ki khynnah skul kiba la ïoh shibun ki jinghikai ha ki skul ki dei ban nang ban bate ïa ka por khnang ba kin ïoh kham bun ka por ha ki jingpule bad ba ka lawei jong ki kan long kaba phyrnai na kawei ka por sha kawei pat lyngba ka jingkiew kyrdan jong ki na kawei ka klas sha kawei pat. “Kiba don ka mynsiem jong ka jingkut jingmut bad ïai-neh tang kita kin poi sha ka thong jong ka jingjop”, ong u bah Staising.
Haba kut jong kane ka jingïalehkai, ki nonghikai ki la ïoh ruh ban sam ïa ki khusnam sha baroh ki nongjop ha ki jait jingïalehkai bapher bapher kata kiba wan ba nyngkong, ba ar bad ba wan ba lai kynthup ïa kiba ïoh best kata Best Senior Boys sha u Albert Nongrem, Best Senior Girls sha ka Sanity Mawlieh, Best Junior Boys sha u Luckyson Nonglang bad Best Junior Girls sha ka Phiwanri Nonglang, Best Sub Junior Boys sha u Banshai Lyngdoh bad u Wanshantngen Nongrem bad Best Sub Junior Girls sha ka Ladapshisha Mawlieh.
Ïa ka Best March Pass ka leit sha ka Green House, ba ar ka Blue House bad ba lai ka Red House bad ka lahduh ha kane ka Annual Sports Meet ka dei ka Blue House bad ka lahduh napdeng ki 3 lai tylli ki kynhun ka dei ka Blue House kaba ka ïoh haduh 118 poiñ.