Shimti biang u Bah Bipul Thangkhiew kum President ka RBYF

Nongpoh, K’lyngkot 15: Kum kawei na ka thong jong ka Ri Bhoi Youth Federation (RBYF) ban dang bteng ïa ka jingshakri na ka bynta ban peit ïa ka eh ka shon bad ruh ban kyntiew ïa ka bha ka miat ki paidbah ha Ri Bhoi District, kane ka seng mynta ka sngi ka la pynthymmai biang ïa ki nongïalam kum ban bynshet ïa kata ka lyngkor nongïalam ban shakri ïa ki paidbah ka them Ri Bhoi.
Ha kane ka jingpynthymmai ïa ki nongïalam, u Bah Bipul Thangkhiew u la shim biang ïa ka lyngkor nongïalam kum u President ba rangbah ka RBYF, nalor kiwei kiwei ki nongïalam kiba kynthup ïa u Bah Liander Nongshli Vice President, O. Bullet Marbaniang, General Secretary, Kynsai Nengnong, Assistant General Secretary, Denis Syngkli, Chief Organizing, P.P Kylla, Finance Secretary Balawan Marwein, Political Secretary R.J Thangkhiew, Publicity Secretary Wanpher Wahlang, Education and environment secretary S. Marbah, Sport Secretary Never Makdoh lem bad kiwei.
Ïa kine ki nongïalam na ka bynta ka samoi treikam jong u snem 2025 haduh u snem 2028 la pynskhem ha ka jingïalang kaba la long mynta ka sngi ha ophis treikam ka RBYF ha Saiden, Nongpoh, ba la pynskhem da u Bah B.B Makdoh, President barim ka RBYF ha ka jingdon lang u Bah E.K Lapang, uba dei u nongïalam barim bad u rangbah shnong ka Saiden nalor kiwei ki nongïalam ka RBYF na ki Zone, Circle bad ki Unit ha Ri Bhoi District.
Kum u President ba rangbah ka seng RBYF ba la pynkup bor biang mynta ka sngi, u Bah Bipul Thangkhiew u la ai khublei ïa baroh ki nongïalam bad ki dkhot ka RBYF ha Ri Bhoi, kiba la ibit biang ïa u ban shim ïa kane ka lyngkor nongïalam bad ha kajuh ka por, u la pynthikna ba un ai ïa kata ka jingïatrei lang na ka bynta ban shakri ïa ka bha ka miat bad ka roi ka par jong ki paidbah ha ka them Ri Bhoi.
Haba kren ha kane ka sngi, u Bah B.B Makdoh, President barim bad u Bah E.K Lapang, nongïalam barim ka RBYF ki la pynpaw ïa ka mynsiem jong ka jingkmen ba ka RBYF kat dang mih ki sngi ka la dang khlaiñ ha ka jingshakri bad ha kajuh ka por ki ai ka jingkitbok kitrwiang ïa kine ki nongïalam ba thymmai ba kin dang don kata ka mynsiem jong ka jingkitkhlieh na ka bynta ban peit kyrpang ïa ki paidbah ka Ri Bhoi bad ruh ba kin long kita ki nongwan rah ïa kata ka jingkylla ha ka roi ka par bad ruh ha ka shongsuk shongsain ki paidbah ka them Ri Bhoi.