Nongpoh, K’lyngkot, 16: Ban phai khmat kyrpang ïa ki jylla shatei Lam Mihngi ka ri India ban kyntiew ïa ka kam rep ka kam riang kaba dei katkum kane ka juk stad ba mynta, ka College of Post- Graduate Studies in Agricultural Sciences (CPGS-AS), Umïam, ba hap hapoh ka Central Agricultural University (CAU), Imphal, ka la pynlong ïa ka National Conference ba ar sngi lynter kaba la plie noh mynta ka sngi ha Auditorum Hall ka CPGS-AS, Umïam, Meghalaya.
Ka phang jong kane ka National Conference la ai ha ka ktien nongwei “Enhancing Agricultural Growth with Special Reference to North East India: Synergizing Industry and Scientific Innovations for Demand-Driven Crop Improvement”.
Ka Kong Ampareen Lyngdoh, kaba dei peit ïa ka tnad ka kam rep kam riang hapoh ka jylla ka la wan ban shim bynta lang kum ka kongsan ban plie ïa kane ka National Conference bad la sakhi lang ruh da ka jingdon lang u Prof. D Thakuria, Chairman & Dean, CPGS-AS, Umïam, Dr. S. V. Ngachan, Former Director ICAR-NEH, Umïam, Dr. J. C Rana, Country head Bioversity, New Delhi, Dr. A.K. Mohanty, Director ATARI-Zone-VII, Dr. T R Sharma, Registrar and Director of instruction, CAU, Imphal lem bad kiwei kwei.
Ïa kane ka National Conference la pynlong ruh da ka jingïatrei lang ka Indian Council of Agricultural Research (ICAR), North Eastern Council, Ministry of Agriculture and Farmers Welfare, bad ka NABARD, ha kaba la wan rah lang haduh 200 ngut ki nongshim bynta, ki nongmihkhmat na SAUs, CAUs, ki samla pule bad kiwei kiwei de.
Ka Dr. Mazel Ampareen Lyngdoh kum ka myntri sorkar, ha kane ka sngi ka la pynpaw ïa ka jingkmen ban ïa shim bynta ha kane ka National Conference bad ka la pynpaw ruh ba ka thong jong ka sorkar jylla ka long ban buh ïa kata ka thong ban pynmyntoi ar shah ïa ki nongrep hapoh ka jylla bad nalor kata ban pynmih bun ïa ki symbai jingthung kiba lah ban ai jingmyntoi kaba khraw ïa ki nongrep hapoh ka jylla.
