Kyrmen bad sngewskhem ka NPP ban jop ka NPP ha ki elekshon ADC

Shillong, K’ Lyngkot 16: U National president ka NPP bad u Myntri Rangbah ka jylla u Conrad K Sangma u la pynpaw ka jingkyrmen bad ka jingsngewskhem ba ka party jong u kan jop ha ki elekshon sha ki artylli ki autonomous district council (ADC) ki ban long ha ka Khasi bad Jaiñtia Hills, ka ban long ha ka 21 tarik u bnai Rymphang mynta u snem.
“Manla ki elekshon ki don ki jingïapher, manla ki elekshon ki long kiba eh bad kan ym don ka jingkylli kaba ong ban long kaba la sngewskhem palat. Ngi donkam ban trei shitom bad ngi kyrmen ba ki kam kin ïaid beit bad ngin jop ha ki elekshon sha ki ADC ha KHADC bad JHADC,” ong u Sangma haba kren sha ki lad pathai khubor.
U la ïathuh ba ka party ka la dep pynlong ïa ka jingïalang bishar kam bad ki kyrtong na ka bynta ka elekshon sha KHADC bad JHADC bad u la ong, “Ngi la ïoh ka jubab kaba biang. Hynrei ki don ruh pat ki jingïaleh bad ngi donkam ban trei shitom. Ki kyrtong jong ngi mynta ki la don sha la ki constituency wat haduh mynta ba ngi kren ïa ki. Kumta kumjuh ruh ki nongïalam jong ngi ki la pynkhreh ha baroh kawei ka jylla bad ki la trei khlem shongthait na ka bynta kine ki elekshon ban wan.”
Na ka liang u Sangma u la bynrap ruh da kaba ong ba baroh ki kam ba ïadei bad ki jingpynkhreh na ka liang ka sorkar ka la shim baroh ki sienjam ban pynthikna ba ki elekshon ha ki 2 tylli ki ADC kin long kiba ïaid beit ïaid ryntih.
Haba kubur ba ka don ka jingïaleh pyrshah kaba dei kaei kaei kaba kano kano ka sorkar kam lah ban kiar, u Myntri Rangbah u la ong, “Hynrei lada phi peit ïa ki kam ba la leh da ka EC ba la ïalam da ka NPP hapoh KHADC, ki la don bun ki bill kaba ngi la don, ki la don bun ruh ki kam kiba dangsah kiba khlem la lah ban pyndep ha ki por kiba la leit, mynta ki la dep hapoh kane ka EC. Namar kata yn ym lah ban ong ba ki la pulom ha baroh ki liang.”
“Haoid, ki don bun ki kam kiba hap ban ïakhun, ki don bun ki kam hynrei ki la don ruh ki kam kiba thymmai bad bun ruh ki projek kiba thymmai kiba dangshen ha kaba ki riewshemphang ki la wanrah shakhmat bad ka EC ka la bei tyngka ïa ki ba kin lah ban ïoh ïa ki jingthoh ne ki database jong ka kolshor u Khasi, ki kyntien ha kiba bun ki bynta, kine ki dei ki dak kiba biang ha kaba kumno kane ka EC ka la trei ban kyntiew ïa kane ka thaiñ bad ban ïalam shakhmat ruh ïa ka district council,” u la ong da kaba bynrap, “Kiba pyrshah kin ong ïa kiba bun ki jingkynthoh hynrei kane ka EC ka la leh bun ki kam kiba dangsah kiba la don bad kiba la lah ban pyndep, ki dang ruh pat ki kam kiba bun kiba dang sah bad ngin bteng ban leh kham bun ki kam ha ki por ban dang wan.”
Halor ka jingpyrshang ban khleh lang ïa ka niam bad ka saiñ pyrthei, u nongïalam ka NPP u la ong, “Ngam don kano kano ka jingkynthoh halor kata naba kane ka shong eh ha ka political party ha kaba kumno ki kwah ban leh ïa kane hynrei nga tharai ka imlang sahlang jong ngi ki kwah barabor ban buh ïa ka mat jong ka niam shajngai na ka saiñ pyrthei. Nga tharai ba ka imlang kan rai bad ki paidbah kin rai, ngam don eiei ban ong, ngam don eiei ban kynthoh kum kaei ka saiñ pyrthei ki la ïalehkai ne kaba ki khlem ïalehkai, kane ka shong ha ki hynrei haba kut ka sngi ki briew kin sa leit ban thep vote bad ban rai bad nga thikna ba ki briew kin sa peit lang na baroh ki liang ha shwa ban thep vote.”
Shuh shuh u Sangma u la ong ba ka party kam kheiñ poh ne ban ai ka dor kaba palat na kano kano ka liang pyrshah jong ka political party.
“Ka long ka bym dei na ka bynta jongno jongno ïa ngi kum ki nongïalam ka seng saiñ pyrthei, ki kyrtong ne kum ka party ban pynrem ïano ïano ne ban pynkiew ïano ïano. Na ka jong ngi kano kano ka liang pyrshah ka long kumjuh. Mynta baroh ki political party, ka Congress, TMC, UDP, bad ki paralok ba ïatreilang naba kine ruh kidei kiba ïatrei shitom. Namar kata ngam tharai kan long kaba lah na ka bynta jong ngi ban ong ba kane kadei ka party kaba paw naba baroh ki dei kiba khlaiñ bad kiba trei shitom hynrei mangi kum ka political party ngin leit da ka jingpyrkhat ba baroh kiba don ha ka liang pyrshah kidei kiba khlaiñ bad ngin bteng ban trei shitom,” u la bynrap.
Lada ka BJP ka ai ka jingkyrshan ïa ka NPP ha kine ki elekshon sha ki ADC, na ka liang u Myntri Rangbah u la ong, “Kane kadei ba phin kylli hi maphi namar ngam don jingtip eiei kaei kaba ki pyrkhat kaba ki mut ban leh ne kaba kim mut ban leh.”