Shillong, K’Lyngkot 16 : U Bah PT Sawkmie, MLA barim ka Mawlai u sngew ba ka la dei ka por ban ai noh da ka honorarium ne ka jingsiew pisa sha ki rangbah shnong na ka bynta ka jingtrei shitom jong ki.
U Bah Sawkmie u la pynpaw ba u la long teng u rangbah shnong kumba 12 snem bad ha kito ki por u ïohi ba kam rangbah shnong ka long kaba khia bad kaba bunkam haduh katta kattta.
Hynrei u la ïoh ba ha kine ki sngi ki rangbah shnong ki la bun kam bha.
Kumta ha ka jingïohi jngai jong u ka long ba u la sngewdei ban ai noh da ka honorarium ïa ki rangbah shnong.
“Lada U Blei u leh isynei bad jop kum u MDC ngan wanrah ïa kane ka ishu ha ka dorbar jong ka District Council ban mynjur ïa ka rai na ka bynta ban ai noh da ka honorarium ïa ki rangbah shnong,” u la ong.
U pynpaw bad u ong ïa kane, naba u ïohi ba kino kino ki kam hapoh shnong poh thaw, ka sorkar ka wad beit ïa ki rangbah shnong, la ka dei ha ka shongsuk shongsain, la ka dei ki skhim sorkar, la ki dei ki kam skul, ki kam job card bad jan baroh ki kam ki jam ki ngat beit ki rangbah shnong.
Kumta u ong ba ka la dei ka por ïa ki MDC baroh ba kin pyrkhat thymmai ban ai honorarium noh ïa baroh ki rangbah shnong kiba hap hapoh u pud u sam ka KHADC.
Shuh shuh u ong ba ki Rangbah Shnong ki la trei shitom haduh katta katta na ka bynta ki shnong jong ki, kumta u la pynpaw ïa kane haba ïalap elekshon sha ki bynta them jong ka Mawlai.
Ha kane ka juh ka sngi ki don ruh katto katne ki riew rangbah na ki bynta them jong ka Mawlai, kata kiba na Umrynjah, Umphrew, Madan Mawkhar bad na Umpling Umjathang, kiba la wer bad pan ïa ka jingkyrshan na ki paidbah nong Mawlai ba ha kane ka ilekshon MDC kaban sa long ha ka 21 tarik u Rymphang, 2025 ba ki kyrshan ïa u bah PT Sawkmie da kaba ong ba watla u la rem hynrei u la bteng ïa ka jingshakri jong u ïa ki paidbah.
