Shimbynta ka UPC, 8 shnong bad ki longkmie ban pynkhuid ïa ka wah Umlew ha Nongtraw, maham ban dusmon ïaki dohkha

0

Nongpoh, Ïaiong 16: Da ka jingangnud ban wanrah ïaka khuid ka suba bad ka jingthmu ban pynneh pynsah ïaki kynja jingim kiba im haki um ki wah bad ruh ban iohi ïaka jingitynnad ka mei mariang, kawei ka kynhun ia kaba la tip kum ka Wah Umlew Protection Committee kaba peit kaba khmih ïa katei ka wah kaba ju pyndonkam da ki 8 tylli ki shnong kiba don ha katei ka thaiñ Nongtraw ha Ri Bhoi District, haka sngi Saitjaiñ, ki la pynlong ïaka jingpynkhuid ïa katei ka wah khamtam ban hikai sha ki paidbah ba ki dei ban ri ban sumar ïaki wah bad pynneh pynsah ïaki dohkha dohpnat.
Ïa katei ka jingpynkhuid ïa katei ka wah la shim bynta da ki nongïalam jong katei ka kynhun haka jingïalam jong u Bah Parek Kharshiing Asst. Secretary katei ka seng, haka jingïatreilang bad ki 8 tylli ki shnong, ka kynhun ki longkmie hapoh ka shatri ka Treilang Village Organisation haka jingïalam ka kong Bahunmon Marbah ba dei ka President jong katei ka Village Organisation.
Katei ka kynhun ka ju pynlong ïaka jingpynkhuid ïa katei ka wah shisien haka shisnem bad buh ruh ïaki jingmaham bad ki jingkyntu ba baroh kiba pyndonkam ïaka um na katei ka wah kin lehkhuid bad sumar khuid khnang ba ka um na katei ka wah kan long kaba khuid bad kaba lah ban pyndonkam ha kino kino ki bynta bad maham ruh khamtam ïaki nongkhwai ba kim dei ban leh dusmon ïaka wah bad ki dohkha hynrei ban sumar sukher naka bynta ban pynneh pynsah ïaki dohkha.
Naka liang ki nongïalam jong ka Umlew Protection Committee kila pynpaw ba katei ka dei ka sienjam ba kum ka seng bad ki shnong ba marjan ki shim bynta man u snem ban pynkhuid ïa katei ka wah kaba ki paidbah ki pyndonkam haki bun rukom, ha kaba la ju theh ruh bun ki dohkha bad kadei ruh ka wah kaba bun naki rawon ki ju tuid bad sngewtynnad ban leit khwai.
Shuh shuh kitei ki nongialam ki la ong ruh ba kitei ki 8 tylli ki shnong ki shanniah beit ha kane ka wah na ka bynta ka sum ka sait bad haba wan ki kam shnong kam thaw kum haba wan ki jingjia ba sngewsih ha ki shnong ki thaw bad kiwei kiwei de ki jingkhawai dawai.

Leave A Reply

Your email address will not be published.