Shillong, ïaïong :Ka Seng Hynñiewtrep Youths’ Council (HYC) Riwar Mihngi Circle ha ka 14 tarik mynta u bnai ka la ïoh ban pynskhem ïa ki nongkitkam bathymmai jong ka Riwar Circle ha ka jingïalang ba la pynlong hapoh ka shnong Mawlam kaba dei kawei na ki shnong kaba hap hapoh riwar Pynursla.
Ha kane ka jingïalang la ïa don lang ruh u Vice president jong ka HYC-Central Body u samla Donbok Kharlyngdoh ryngkat kiwei pat ki nongïalam na ka Central Body bad kiwei kiwei ki ba wan ban ïadon lang ha katei ka sngi.
Na ka liang u samla Donbok Kharlyngdoh u la pynskhem ïa ki nongïalam bathymmai jong ka Riwar ha ka jingsakhi lang da ki nongïalam shnong kiba kynthup ïa ki Rangbah shnong bad kiwei pat.
Ha kane ka jingïalang la ïoh ruh ka jingkren kyntu kynpham bad ki kyntien ai mynsiem na utei u nongïalam ka Central Body na ka bynta ki nongkitkam bathymmai jong ka Seng khnang ba kin lah ban pyntyllun shakhmat ha ki jingtreikam ki jong ka khamtam ha kaba ïadei bad ki mat kiba ktah ïa ka ri bad ka jaidbynriew.
Nalor kata la ïoh ruh ka jingkren na kiwei pat kynthup na ki nongïalam bathymmai jong ka seng HYC Riwar Mihngi Circle nalor kiwei kiwei pat.
Ki nongkitkam bathymmai jong ka HYC-RMC ki kynthup ia u President u Lamphang Khonglam, General Secretary Donlang Khongkrom, Organizing Secretary Shlan Buhtep, Public Secretary Emu khongsdir, Vice president Pishon Buhtep bad samla Dimorlang Khonglam, Assistant secretary Bikrom khongjee nalor kiwei kiwei pat.Kane ka long katkum u kyrwoh lyngba u president ka HYC-RMC.
