Jowai, Ïaïong 16: Ka Jowai Welfare Contract Association (JWCA), hapoh ka jingïalam jong u ma Philanderwell Lyngdoh President ka seng bad u Aziz War General Secretary ryngkat bad ki dkhot jong kane ka seng, ha ka sngi ba kane ka seng ka dap san snem pura, kala pynkup burom ruh ïa u MLA ka Jowai Constituency u ma Wailadmiki Shylla, ha kane ka 14 tarik u Ïaïong ha Treiongriang wah Myntdu.
Ha kane ka jingïalang ka seng kala ai ka jingïaroh ïa u MLA ka Jowai u ma Wailadmiki Shylla uba la lah ban wanrah ïa ka roi ka par hapoh ka Constituency baroh kawei bad khamtam eh ïa ka jingpyntrei ïa u surok hapoh nongbah Jowai katkum kane ka juk kaba mynta.
Ka seng ka khmih lynti ruh sa shibun kiwei pat ki kam kiba ïadei bad ka roi ka par bad pynphuh pynphieng ïa ka nongbah Jowai baroh kawei kin sa wan shuh shuh.
Ha ka jingkren u MLA u ma Wailadmiki Shylla, ula ai ka jingïaroh ïa kane ka seng jong ki Contractor kiba long ka kti kamon kadiang ha ka ban ïarap ia ka sorkar ban pyntrei ïa ki kam kiba ïadei bad ka roi ka par jong ka Constituency bad ka jylla hi baroh kawei.
Ula kit bok kit rwiang ruh ïa kane ka seng bad ïa ki dkhot jong ka baroh ba kin nangïoh ïa ka met kaba koit kaba khiah ha kaba kin lah ban trei ïakane ka kam. Ha kane ka jingïalang ladon lang ruh ki sahep sorkar na ki tnad bapher bapher kiba ïadei kam bad kane ka seng.
