Nongpoh, Ïaiong 16: Ka Ri-Bhoi Welfare Organisation (RBWO), kala ai ka jingïaroh ïa u Superintendent of Police ka Ri-Bhoi ryngkat bad ka kynhun pulit halor ka jingtrei shitom jong ki rat diengkhong ïa u drok ha Ri-Bhoi District kaba dei ka jaka rung jaka mih jong ka jylla. Haba phah ïaka kyrwoh naka liang u Bah Eddie G Kharbani kum u nongïalam ka seng u la pynpaw ka jingsngewkhia halor ka jingkharoi u drok, naduh ki nongdih bad ki nongkhaii kaba buh jingma kaba khraw ïaka imlang ka sahlang ha ka dong Ri-Bhoi bad ka jylla baroh kawei kumba u drok u la rung ha man ki bynta jong ka shnong bad ki kyndong kynshroit, kaba la pynlong ruh ïaki kam sniew ban roi haka jylla.
U la ong ruh wat hapdeng ka jingpyrshang jong ki nongkhaii ban rung lyngba ka jylla ban khaïi ïa u drok, hynrei ki pulit ka Ri-Bhoi kim shym la ailad bad pyrshang katba lah ban pynduhjait bad kem ruh bun sien naka por shaka por naduh u kynja, u drok bad kiwei ki jingdih buaid kaba la paw shai ba ka jingkhaii ïa u drok kala long kaba jur haka jylla.
Halor ka jingtrei shitom jong ki pulit ban kem bad ban pynduhjait ïa u drok, naka liang ka seng RBWO kala ai ka jingïaroh kaba khraw ïa ka kynhun ki pulit ka Ri-Bhoi halor ka jingtrei shitom jong ki bad kyntu ruh ba kin dang trei khambha ban rat diengkhong ïa u drok naka district bad ka jylla, bad kum ka seng kan ai ka jingïatreilang bad ki bor pulit naka bynta ban pynduhjait ïa utei u jait jingdih buaid bala pynjot ïakiba bun ki longiing longsem, u la bynrap.
