Shim khia ki bor district ban peitngor ïa ka jinglong jingman hapoh EJHD na ka bynta ka jingïaid beit ka elekshon

Khliehriat, K’lyngkot 25: U Deputy Commissioner (Election) East Jaiñtia Hills District ha ka jingpyllait khubor mynta ka sngi, u la ïathuh ba ki bor synshar district ki la buh ïa ka District Committee ka ban peitngor ïa ka jinglong jingman hapoh ka district kaba dei katkum ka Model Code of Conduct kaba na ka bynta ban pynneh pynsah ïa ka shongsuk shongsaiñ bad na ka bynta ka jingïaid beit ïaid ryntih ka Meghalaya Legislative Assembly election ka ban sa long shen.
La ong ba haduh mynta, ki dkhot jong katei ka Committee kim pat shym la lap ïa kano kano ka kam ka ban pynkhieñ ïa ka Model Code of Conduct bad ym pat shym la don kano kano ka ejahar ban ujor pyrshah ïano ïano lane ym pat shym la don kano kano ka jingunjor ïa kino kino ki kyrtong ïakhun election ha kaba ïadei bad ka jing sam kyiad bad jingsam pisa.
Ïa ka kam ban peitngor ïa ka jinglong jingman la ïatreilang ruh bad ki bor pulit, ki Statistic Surveillance Team lane ki Flying Squad, ha kane ka District Committee la long dkhot ruh da u Project Director, DRDA East Jaiñtia Hills District, u bah G.Warjri, MCS kum u Chairman, u Nodal Officer Expenditure Monotoring, u bah J.Shylla, MCS kum u Convener bad u Treasury Officer East Jaiñtia Hills District, u bah L.Lyngdoh kum u dkhot.