Sha Mawkyrwat hiar ki nongïalam ka Mahila Congress ban pynshai ïa ki nongkyrshan ka party

Mawkyrwat, K’lyngkot, 25: Kum shibynta ban ïa phylliew jingmut na ka bynta kane ka elekshon MLA 2023, mynta ka sngi ka 25 tarik u Kyllalyngkot, 2023 ki nongïalam jong ka Meghalaya Pradesh Mahila Congress Committee (MPMCC) ki la wan hiar sha Mawkyrwat na ka bynta ka jingïakynduhlang jong ki Mahila Congress Mawkyrwat Block ha kaba ïa ka jingialang la pynlong ha ophis treikam jong party ha shnong Mawlangwir, South west Khasi Hills District.
U Bah Carnes Sohshang uba long mynta kum u kyrtong u ban sa ïa ai reng na ka Mawkyrwat Constituency napoh ka Indian National Congress (INC) ha ka jingkren jong u, u la ong lada um ieid ïa ki paidbah um don shuh bad kane ka Indian National Congress (INC) namar la bun ki khep ba kiwei ki party ki la tyrwa sngewbha ïa u da ka ka pisa bad ka rupa hynrei um kwah ïa kata. “Ngam dei uba duk hynrei nga riewspah ka mynsiem kaba kiwei kim lah ban thied ïa da ka pisa pliah”, ong u bah Carnes Sohshang.
Ha kane ka sngi la ïa donlang ruh ka kong Victorealness Syiemlieh ka kyrtong jong ka Indian National Congress (INC) na ka Ranikor Constituency, ka kong Joplyn S. Shylla, President ka Meghalaya Pradesh Mahila Congress Committee, ka kong Aldella Lyngdoh, Secretary ka Meghalaya Pradesh Mahila Congress Committee, ki nongkitkam ba hakhmat jong ka Mawkyrwat Mahila Congress Block Committee bad da ki katto katne ngut ki longkmie kiba la wan ban sakhie lang ha kane ka jingïalang.
Lah ruh ban kdew ba ha kane ka sngi la ïoh ruh ka jingpdiang burom ïa ki longkmie kiba dang wan rung thymmai kiba na kiwei pat ki party kiba la wan pynïasoh ïa lade bad ka Indian National Congress (INC).