Nongstoiñ, K’lyngkot 25: U MDC ka Mawkynrew u ba long ruh u senior vice president ka party HSPDP, u ka ñiew tang ïa ki kam kiba u (L) Bah Hoping Stone Lyngdoh, nongseng ka party da kaba ong ba ñiar ban shem ki nongialam ba radbah shisha kum une u nongialam ba radbah ka jaidbynriew.
“Nga dei tang u para jong u, hynrei nga la ïohi dalade haduh katno shisha u da pynlut por u da trei shitom ban thoh ban pruid ïa ki kot, na ka bynta ban pynlaitluid ïa kane ka ri baieit jong ngi na ki ain ka sorkar India kiba tyngkhuh ïa ka rukom long rukom im jong ngi shane. Ha syndah jong u, nga la don kum u para bad u da long shisha u nongialam u ba ngam pat shem satia ïa ka jinglah ban aiti, hynrei u la long dieng bah marwei ban ïohi jngai na ka bynta ka jaidbynriew. Ngi donkam ban pynneh bad ïai ïaleh halor ki nongrim kiba skhem ki ban ïa da ïa ka jaidbynriew jong ngi”, u la ong.
“Ha nga hi nga shu sngew ban kyntu sha ki paidbah ba ngim ioh shuh kum ka HSPDP, kaba don ka nongrim ba skhem ban ïeng ïaleh na ka bynta ka jingbha jong ki paidbah salonsar jong ka jaidbynriew, khlem da kheiñ ïa u ba don ba em ne u duk u suk. Ha Nongstoiñ ka dei ka tynrai bad ka burom jong ka HSPDP ba u ne u nongïalam u la ïalam ïa ka jaidbynriew. Mynta ka pali ruh nga sngew ban kyntu sha ki paidbah, ba ki dei ban kyrshan ïa u Bah Sanjied na ka bynta ka lawei jong ka pateng ban wan”, u la ong.
U la ong ruh ba u Bah Hoping kum u riewsaiñ pyrthei u long ruh uba shisur shidur bad uba ieid ia ka jaidbynriew.
