Nongstoiñ, K’lyngkot, 25: “Nga ka khot nga wer ïa phi ki paidbah bad sha baroh ki nongkyrshan jong ka HSPDP, ba ngin leit sha kane ka elekshon ba mynta da ka mynsiem kaba don ïa ka hok bad ka jingshisha”, ong u kyrtong jong ka HSPDP Nongstoiñ Bah Sanjied Kynsai Shangrit, haba ai jingkren ha ka jingïalang jong ki nongkitkam jong ki Primary Unit ka party ha Vanni Hall Pyndengrei, Nongstoiñ.
“Nga wan hakhmat jong phi ym da ka spah ka phew, hynrei da ka mynsiem jong ka jingieit bad jingsngewrit nga kwah ban thied ïa phi. Kynmaw phi ki paidbah da pyrkhat da puson ha kano ka lynti ba phi ïaid ha kane ka elekshon, namar ïoh lehse ka jingbabe kan sa wan hadien. Nga la shakri kum u nongïalam sengbhalang ha ki por ba la leit. Hynrei mynta nga don ka jingthmu ban shakri khambha ïa ki paidbah lyngba kane ka party, kaba phi phew hajar ngut ki mynsiem ba lui lui ba la ju ïai kyrshan da ki phew tylli ki snem”, u la ong.
“Phi dang kynmaw ba ha u 2019 ki nongkitkam lyngba ki Primary Unit ki la dep jied ïa nga ban ïakhun ïa ka elekshon. Hynrei, ki ba halor da ka jingburom ki la aiti noh ha u Bah L.G Nongsiej ïa ka tiket, ha kaba nga ruh nga la kynran dien bad khlem ïaknieh tiket nga la ïaineh ha ka party. Ka daw namar ngam dei u nongpynjot party hynrei u nongtei ïa ka party. Nga la don ha ka party da ki phew snem haduh mynta, ta ka daw lada phi ngeit ha ka jingpynthame jong kito ki briew kiba wan ha ka party na ka bynta ka jingmyntoi ïalade, phi la bakla jur haduh katta katta”, u la ong.
“Ngim dei ban sngap ha ki jingpynthame, kumba la kynnoh ha kine ki taiew bad ki bnai ba la leit, ba nga la shah pynthied ïa ka tiket da kata ka seng NPP. Kine ki dei tang ki khubor lamler ki khubor kiba kwah ban pynthohbria ïa nga bad ïa ka party HSPDP hi baroh kawei, namar ngam dei u nongkhrong”.
Ha ka jingïadei bad ki samla u Bah Sanjied u la ong, “Wat ym ïa khñium shuh nangne shakhmat kumba phi la ju ïa khñium baroh shikatta. Lada nga jop ka kam ba hakhmat kaba nyngkong eh ka dei ka rukom thung kam thung jam hapoh Nongstoiñ. Nga hi ngam kwah ban tuklar ïano bad mano ban ïoh kam, hynrei ai u ta u ba trei shitom, u ba stad bad u ba dei hok ban ïoh, ai un ïoh shwa ïa ka kam. Ngam dei u ba ong ba tang ïa kita kiba kyrshan ïa nga lane u ba dei ba haïing jong nga un ïoh shwa”, u la ban biang.
“Ñion beit ha ka symbol jong ka dur u Sing ba sa shisien ngin ïoh biang ïa ka jingjop bad ka burom ym tang jong ka party, hynrei ïa ka dong ka thaiñ, ka jaidbynriew bad ki khun ki ksiew pateng kin ïoh ïa ka jingkyrkhu lyngba ka jingsynshar kaba khuid ka bym don jingnoh shilliang ïano ïano”.
“Kam dei ban don ka jingïapher hapdeng kiba riewspah bad kiba duk, lane ka jingïapher hapdeng u ba khraw ne ba rit. Hynrei, ai ba uta u ba trei shitom u dei ban ïoh ïa la ka jong ka hok. Leit sha kane ka elekshon mynta ka kynti ruh da ka lynti jong ka hok bad jingshisha, kumba u Maieit Hoping u la ju kren man ka por mynba u dang don bad ngi”, ong u Bah Sanjied.
U Bah K.P Pangniang President rangbah ka party haba pynkynmaw ïa ki kam bad jingïalam jong u Maieit Hoping ban ïakhun pynïoh ïa la ka jylla u la ong ruh, “Ka party HSPDP kam dei ka party ban shu thied briew. Hynrei ban don ka mynsiem ieit ri, ban don da kita ki hynñiew sngi lane 30 sngi ha phatok, kata keiñ ka dei ka mynsiem jong ka HSPDP. Ban ïada ïa ka ri bad ka jaidbynriew kam dei da kaba ngi thied da ka pisa, hynrei ka mynsiem ba shynrang”.
“Kumba long mynta ngim don shuh uwei ruh u MLA, hynrei to tip ba ka party mynta kan sa dap 60 snem bad ha une u 2023, kan dap 55 snem bad kan sa pyiar la ki thapniang bad ka burom jong ka party kan sa paw da ka jingkyrkhu jong u Maieit”.
“Mano ba la kren ïa u pud u sam hato ym dei ka HSPDP kaba la ïai dawa ïa kane la palat 50 snem. Hato phin shem ïa kane ha ka mat ïakhun elekshon jong kiwei ki party. Ngim pat jop hynrei ki la ïai kren bad ïai dawa. Hynrei kine kiwei ki party ki sngew ba ka long kaba dei, ki sdang ban khyllie kylla, hynrei kim poi shaei shaei namar ka dei ka ishu ba shu tuh na kiwei”.
“Ka HSPDP naduh ba sdang ka ong ba ka jinglong trai jong ngi ha ka khyndew ka shyiap, ngi dei ma ngi ban bat bad ngi dei ban ong ïa ka sorkar India ba ka dei ban weng noh ïa ka 12 A. Ïa kane ngin ïai dawa bad ban ïakhun ha Delhi ban weng noh ïa ki kyndon aiñ kiba ngi hap shah pynïaid na Delhi ha ka jingïadei bad ka jinglong trai jong ngi ha ka jinglong trai ha ka khyndew ka shyiap”.
Ha ka jingïadei bad u Bah Sanjied kum u kyrtong na Nongstoiñ u la ong, “Ka party hi ka sngew dei bad I dei ruh ba u ne u samla rangbah u kham don ka hok ban ïaleh na ka party, namar naduh ki phew snem ma u bad ka ïing ka sem ki la don lypa ha ka party hapoh ka jingïalam jong u kpa jong u, u Bah Barly Thabah. Hato kumno ngin shu ai sha kiwei nongwei kiba shu wan kynsan ban shu knieh jubor ïa ka tiket. Namarkata ñion beit ha u Sing ha kane ka kynti ba mynta bad ai ka jingshaniah ha une u rangbah jong ka party. Phi ki paidbah Nongstoiñ phi la mad ïa u Saw ha kine ki san snem, mynta ka kynti ngin ñiom ha u San”, u la ong.
Kiwei kiwei kiba la ai jingkren ha kane ka jingïalang jong ki nongkitkam ka party ki long u Bah Michael Thongni General Secretary HSPDP Nongstoiñ, Bah Nolipstar Lyngdoh President Mawkyrwat Area HSPDP, Bah Martle Mukhim MDC Mawkynrew bad kiwei kiwei ki nongkitkam hapoh jong ka Party.
Ha kane ka sngi, na ka liang u Bah Martle Mukhim u ba long ruh u Senior Vice President la ïoh ban pynskhem ïa ki nongkitkam jong ka party HSPDP Nongstoiñ area unit, kaba kynthup naduh ka parent body, women wing bad youth wing. Kumjuh ruh shwa kane ka jingïalang ki nongkitkam ka party ha Vanni Hall, ka la don ka jingleit plie da u President rangbah ka party ïa ka ophis treikam ba thymmai jong ka party kaba don ha ka shnong Upper New Nongstoiñ.
