Lahduh u Shiningstar bad ka Marqueenless ha ka National Voters Day Run 2023 ha Mawkyrwat

Mawkyrwat, K’lyngkot, 25: U Shiningstar Marweiñ (00:31:07) bad ka Marqueenless Ramsiej (00:40:12) ki long ki ar ki nongjop napdeng ki nongïashimbynta ha ka jingïakop mareh thong kiba ha ka karta kaba 18 snem shajrong ba la pynïaid da ka ophis jong u Deputy Commissioner & District Election Officer, South West Khasi Hills District ha ryngkat District Sports Officer, South West Khasi Hills District, Mawkyrwat ha ka jingrakhe ïa ka National Voters Day 2023.
U bah T. Lyngwa, IAS, uba long u Deputy Commissioner bad kum District Election Officer, South West Khasi Hills District u la kaweh ïa ka lama kum ka dak ban plie ïa ka jingïamareh kaba la sdang na Deputy Commissioner ophis bad ba la pynkut ha Photumnew, Mawkyrwat.
Lah ban kdew ba ki nongïashimbynta ha kane ka sngi ki long haduh 220 tam ei ei ki nongïamareh ba kynthup naduh ki hep kiba rit, ki samla shynrang bad kynthei bad kumjuh ruh ki ‘riew rangbah na kylleng ki shnong jong ka South West Khasi Hills District.
Lah ban kdew ba kiwei pat ki nongjop ha kane ka jingïakop mareh ki long u Iwelljohn Ramsiej, u Jomsingstar Ramsiej katba jong ki kynthei pat ki long ka Aidaris Lyngkhoi, ka Maidalari Wanniang kiba dei ha ka karta 18 snem shajrong. Nangta, kiba 13 – 17 snem jong ki shynrang ki long u Neverson Jyrwa, u Johnstar Sohphoh bad u Nangkyrshan K. Wanniang katba jong ki kynthei ki long ka Selbiana K. Wanniang, ka Elfidary Wartde bad ka Ikyntiewshisha Ramsiej.
Ki nongjop jong kiba 12 snem shynrang ki long Bankitbok Ramsiej, u Tislang Wahlang bad u Damangkynsai Wartde. Jong ki kynthei pat ki long ka Larijanai Wartde, ka Rikynti Kharjahrin bad ka Kyntimery Ramsiej.
Ha kane ka sngi la ïoh ruh ban sam ïa ki khusnam sha ki nongjop kiba la kham rangbah kata u Darius Lyngdoh, 60 snem karta bad kumjuh ki khynnah rit kata I heprit Davidlewis Kharwanniang, 4 snem karta bad I heprit Idapynkmen Marpna, 6 snem karta. Ïa ki nongjop ha kane ka sngi la ïoh ban sam da ki khusnam, ka syrnod ha ryngkat ka song pisa.
Haba kren lamphang halor kane ka sngi u bah K. Nongsteng, MCS, EAC, South West Khasi Hills District Mawkyrwat u la ong ba la rakhe nyngkong eh ia kane ka sngi ha ka 25 tarik u Kyllalyngkot, 2011 ha kaba ka Election Commission jong ka ri India ka la buh khnang ïa kane ka sngi na ka bynta ban pynjur ka jingpynrung kyrteng khnang ba kan don ka jingïashimbynta salonsar jong ki paid nongthep vote.
Haba kren ha kane ka jingïalang ba lyngkot, u bah T. Lyngwa, Deputy Commissioner jong ka South West Khasi Hills District u la ong ba ka jingthmu ba kongsan jong kane ka sngi ka long ban kyrsiew thiah ïa kito ki nongthep vote kiba la dep ïa ka jingpynrung ne don kyrteng ba kin mih shakhmat bad ban ym pynsep-ei ïa kane ka kabu ksiar kaba ka Election Commission ka Ri ka la pynkup bor ha ngi da kaba ngi jied ïa ki nongmihkhmat katkum ka mon bad ka jingsngewthuh jong ngi khlem kano kano ka jingshah pynbor.
Ha kajuh ka por u la pynpaw ïa ka jingsngewkmen ban ïohi ïa kiba bun ki nongïashim bynta kiba la wan ban ïa mareh ha ka jingrakhe ïa kane ka sngi da kaba pynshlur ïa ki ban pynmlien ban mareh na ka bynta ka met kaba koit kaba khiah krat ban lait na ki jingpang kiba bun jaid ban long kiba ryntih (discipline) ha baroh ki liang bad ban lait na ki jingmlien kiba sniew kiba ktah ym tang shi met hynrei wat Ïa ka imlang ka sahlang. Nangta, u la pynshlur bad ai mynsiem ïa ki ban nang leh bha shuh shuh khnang ban lah ban jop bad ïa khun ha ki jingïakop bapher bapher da kaba pynpaw ba kane ka dong ka thaiñ ka don ki marathon runners kiba la paw bad u khmih lynti ba kin nang mih shuh shuh ha ki por ki ban wan ki ban wanrah nam rah burom bad ki ban long ka jingsarong ïa ka dong ka thaiñ.
Hadien kane, u bah T. Lyngwa, Deputy Commissioner ka South West Khasi Hills District ula ïalam ha ka jingpule ïa ka Voters Pledge bad ha kajuh ka por la ïoh ruh ban sam ïa ka khusnam bad ka syrnod sha uwei u nongdro dur uba don jingduna ha ki dkhot met kata sha u bah Goldenstar Thongni kum u PwDs Youth Icon SVEEP Partner.
Ïa kane ka jingïalang la pynïaid da u bah L.T. Tariang, MCS, Additional Deputy Commissioner ka South West Khasi Hills District katba u bah Iohbor Diengdoh u la ai ki kyntien khublei.