Shillong, Kyllalyngkot 25 : Kum shi bynta ban rakhe ïa ka sngi ki nongthep vote ne ka National Voters Day ha ka 25 tarik Kyllalyngkot 2023, ka ophis u Chief Electoral Officer jong ka sorkar Meghalaya ha ryngkat ka jingïatreilang bad ka ophis u District Sports Officer, East Khasi Hills District, Shillong, ka la pynlong da ka jingpynïakob ïamareh ne kaba la tip kum ka “National Voters’ Day 21K, 10K, 5K bad 1K Run”.
Ha katei ka jingpynïakob ïamareh ki la don haduh 800 ngut kiba la wan ban ïashim bynta naduh kiba 14 snem haduh kiba 50 snem. Ïa ka jingmareh 21K bad ka Cycling la kaweh ïa ka lama da u S.C Sadhu, IAS Deputy Commissioner jong ka East Khasi Hills District bad ïa ka 10K, 5K bad 1K la kaweh ïa ka lama da ki ophisar ka tnad elekshon jong ka sorkar jylla.
Haba kaba kut jong ka jingpynïakob mareh la sam ruh ïa ki khusnam nongjop ba la sam da u bah D.P Wahlang IAS, Chief Secretary da ka jingïarap sam lem kiwei ki ophisar kaba la pynlong ha ïing dorbar thaw aiñ barim kaba don ha Khyndailad, Shillong.
Ha kane kajuh ka sngi ka tnad elekshon jong ka sorkar jylla ka la pynkup burom ruh ïa ka Kong Kmoiñ Wahlang ka longkmie kaba paw bha jong ka jylla ha ka jingmareh thong kaba la ïashim bynta lang ruh ha kane ka jingïakop mareh.
