Shim khia ka JSM ban leit ïakren sngewthuh jingmut bad ka KSA ha Guwahati

Jowai, Jylliew 04 : Ban wanrah biang ïa ka jingshong suk shong shngaiñ ha ki thiañ khappud hapdeng ki ar tylli ki jaitbynriew kata ki Pnar bad ki Karbi kaba la neh da ki katto katne bnai, naduh ba la mih ka jinghuri hura na ka daw ka jingwan buh ïa ka ‘Entry Tax Gate’ da ka Karbi Anglong Autonomous Council (KAAC) ha ka shnong Khanduli West Jaiñtia Hills District.
Kine ki ar tylli ki sengbahlang ki kynthup ïa ka Karbi Students’ Association (KSA) na Karbi Anglong District jong ka Assam bad ka Jaiñtia Students’ Movement (JSM) na Ri-Lum Jaiñtia jong ka jylla Meghalaya kila pynlong ka jingkynduh lang ha kane ka sngi saitjaiñ ka 3 tarik u Jylliew ha Karbi Hemtun, 6th Mile Guwahati (Assam).
Ha kane ka sngi kitei ki kynhun sengbhalang kiba ïakren halor kumno ban wad ki lad ki lynti ban wanrah biang ïa ka jingshongsuk shongsaiñ ha ki jaka khappud ha ki thaiñ Karbi Anglong bad ki shnong khappud ka Jaiñtia jong ka jylla Meghalaya.
Shuh shuh ha kane ka jingïa kynduhlang la don lang u President KSA Jemson Timung, President CB JSM Leningstar Rymbai, Secretary bad ki dkhot jong kine ki ar tylli ki sengbhalang.
U President CB JSM samla Leningstar Rymbai ha ka jingkren ula ong ba ka seng ka dap da ka jingsngewkhia kaba jur hadien ka jingmih jong ka jingïakynad hapdeng kine ki ar jait bynriew, kumta ka seng ka la shim ïa kane ka bynta ban ïakynduh lang khnang ba kito kiba im ja da ka kam rep sha kitei ki jaka khappud kin ïoh biang ban leit rep kumba long ha ki por ba la dep.
Na ka liang u samla Ribok N Biam President ka JSM-WR Ula ong ba ka jingwan jong ki mynta ka sngi ka long tang na ka bynta ban ïakren halor kumno ban wanrah ïa ka jingsuk ula pyntip ruh ba ki la tnaw syndon da ka (Pnar and Karbi Peace Committee).
Haka juh ka por ula pyntip ba ka kam jingpynbeit pud hapdeng ki ar jylla Meghalaya bad Assam ka dang ïaid shakhmat mynta, kumta u kyntu ïa kiwei ba kim dei ban pynmih kino kino ki jinghuri hura ha kitei ki jaka.