Jowai, Nailur 30: U ma Lahkmen Rymbui, MLA ka 7-Amlarem (ST) uba dei ruh u myntri ka tnad pule puthi, Information & Public Relations, Law bad Revenue & Disaster Management, mynta ka sngi ula plie ïa ka building kaba don hynñiew tylli ki kamra klas jong ka Padu Bah Government Lower Primary School.
Ïa kane ka ïing thymmai la shna hapoh ka DSEL Scheme 2023–2026 naka bynta ka jingmyntoi jong ki khynnah skul ka thaiñ. Ha kane ka prokram la wan ban sakhi lang da u Het Pohthmi uba dei u MDC ka War West kum u symbud kongsan, ka kong W. Nonghuloo, SDSEO, Amlarem, ha ryngkat u Waheh Shnong bad Secretary ka Padu Bah, ki nonghikai, ki kmie ki kpa, ki dkhot jong ka School Management Committee, ki khynnah skul bad kiwei de.
U ma Lahkmen Rymbui haba ai jingkren ula pynpaw pynpaw ka jingsngewnguh ïa U Blei bad ai khublei ïa baroh kiba don bynta lang bad ka skul, Ula pynsngew ïa ka thong jong ka sorkar hapoh ka jingïalam jong u Myntri Rangbah ka jylla u Conrad K. Sangma ban pynkhlaiñ shuh shuh ïa ka pule puthi hapoh ka jylla.
Ula kdew ruh halor ka jingkiew jong ki jaka pule ha kylleng ki jaka jong ka Amlarem Sub-Division, da kaba kdew ruh ïa ki skul RMSA kiba don ha Shkenpyrsit, Trangblang bad Umladkhur bad mynta ka jingthmu ban pynïar ïa ka Secondary Education ha Jong U Chen bad Kharkana. Shuh shuh ula pynnsgew ha kaba ïadei bad ka Eklavya Model Residential School (EMRS).
Nalor kata sa ka jingïarap pisa ka sorkar sha ki samla pule kynthup ïa ki kot pule, uniform and composite grant bad ka Scholarship, ula pynsngew ruh shaphang ki skim pynroi bapher bapher jong ka sorkar kiba ïadei bad ka imlang ka sahlang, ka rep ka riang, ka kam jngohkai pyrthei, ki mar rep bad ki kam seng kam seng jam.
U Myntri ula kren ruh shaphang ka CM-Elevate bad ka Hello Meghalaya, kiba ai lad ïa ki samla ban kyntiew ïa ki sap ki phong jong ki bad ban wad ïa ki lad kamai. Nangta u ma Lahkmen ula pynsngew halor ka Meghalaya Teacher Training Academy bad ula ban jur ïa ka jingdonkam ban ïai bteng ban ai jinghikai bad kyntiew ïa ki nonghikai ha kane ka kam.
Na ka liang ka Rammon Mukhim, Headmistress, Padu Bah Government Lower Primary School kaba pynsngew ïa ka jingïaid lynti jong ka skul kaba la sdang ban seng naduh u snem 1954, la ïoh jingkren ruh na kong W. Nonghuloo, SDSEO, Amlarem, ma Het Pohthmi, MDC War West bad ka jingkren ai khublei na u T. Pohthmi.
