Mairang, Nailur 30 : U mawsiang Kyllang uba la ju khot u lum Kyllang u dei uba don ïa ka khana pateng kaba sngewtynnad bad ka jaka ha kaba utei u lum u don ka la kylla long ka jaka shangkai pyngad jong ki briew na kylleng ki jaka khamtam eh ha ki bnai tlang. Ha ka jing leit peit jong u nongthohkhubor jong u Mawphor ïa katei ka thaiñ ha kane ka sngi balang ka 30 tarik Nailur la ïoh ban leit kiew ruh shaduh sha kliar jong utei u mawsiang ba m lah ban len ba ym don uwei pat u mawsiang hapoh ka jylla u ba kham kynjang ban ïa u maw Kyllang.
Ha katei ka sngi haba la poi ha kjat jong utei u lum la lap ba u don uwei u nongap uba peit ba khmih ïa katei ka jaka . Ha katei ka sngi la ïoh ban ïakren sani bad utei u nongap bad haba kylli ba katei ka jaka kaba u don utei u lum Kyllang ka dei ka jaka paitbah ne ka jaka jong ki riew shimet .Utei u nongap u la ïathuh ba katei ka jaka baroh ka dei ka khyndew kur jong ki jait Lyngdoh Kyllang kiba shnong ha ka shnong Mawsmaikyllang kaba don sha phang shatei ha trai jong utei u lum.
Nalor kata u la ïathuh ruh ba ka kur Lyngdoh Kyllang kiba dei trai ïa katei ka jaka ki don la ka komiti kaba kyrpang kaba don ïa Chairman Secretary bad ki dkhot jong ka komiti . Ha kaba ïadei bad ka jingwan ki nongshangkai suwari ha katei ka jaka u la ong ba ha kine ki sngi ki dang duna bha hynrei ha ki bnai tlang pat naduh u bnai Nohprah haduh u bnai Rymphang bun bah ki nongshang kai na kylleng ki jaka ki wan poi. U la ong ruh ba man la ka sngi naduh dang step u la mih na shnong ban wan ha katei ka jaka . Nalor kata ïa ka lynti ban kiew haduh ha kliar jong u maw Kyllang u hap ban pynkhuid bad sar ïa ki sla dieng bad u hap ban ap ha katei ka jaka haduh ka por san baje janmiet nangta u sa leit phai noh sha shnong.
Haba pyrshang ban kiew ïa utei u lum la lap ba naduh na ka jaka pynieng kali hap ban ïaid lyngba ka lynti kaba dap da ki khlaw ba jyrngam bad ka lynti kaba khuid bha. Nalor kata la lap ruh ba baroh shi lynter lynti haduh ban da poi sha kliar u maw Kyllang la buh da ki signboard bad thoh ïa ki jingmana ba ym dei ban bret pathar ïa ki jaboh jabaiñ ne pynjakhlia.
Ha kajuh ka por la pa ba la buh ruh ïa ki polo ba kino kino kiba wan rah jingbam ki dei ban thep ïa ki songjingbam ha ki polo haba ki la dep bam hynrei kaba sngewsih ka long ba ki don ki nongleit shangkai kiba leh bym suidñew da kaba bret pathar ïa ki jaboh jabaiñ bad ki plastik wat la ki polo ki lah don ha kitei ki jaka shongkai ruh. Ka jingleh bym suidñiew bad pynkheiñ ïa ki jingmana ba la thoh ha ki signboard ka pyni ba ki ba bret jaboh ha kitei ki jaka ki dei ki bym don ka jingñiewkor ïa ki kyndon ba ki trai jaka ki la mana.
