Mynjur u Lat ïa ka GHADC (Second Amendment) Rules 2026 yn ïoh thep vote tang ki paid riewlum Garo

Shillong, Nailur 30 : Ka Elekshon MDC sha ka ïing Dorbar ka Garo Hills Autonomous Distrct Council (GHADC) kan don mynta da ka electoral roll ba dei thik tang ki Paid Riewlum Garo trai ri ym shuh ban ïoh bynta ki bar jylla hadien ba u Lat ka Jylla CH Vijayashankar ula ai jingmynjur ïa ka jingpynkylla ne amendment jong ka GHADC (Second Amendment) Rules, ban pynïaid ïa ka elekshon ka Council.
Ka khubor bala ïoh ka ïathuh ba u Lat ula ai jingmynjur ïa ka Amendment ha ka sngi Ba-ar-ka 29 tarik Nailur.
Da kane ka jingai jingmynjur, ka Sorkar Jylla ha ka sngi Balang kan pynmih ïa ka jingpynbna jong ka GHADC (Second Amendment) Rules, 2026 ha ka Gazette ka Jylla.
Ka jingpynbna kan pyntreikam noh mardor ïa ka amendment jong ka Assam and Meghalaya Autonomous Districts (Constitution of District Councils) Rules, 1951.
Ha kane ka aiñ, ka Rules 8 ka long kaba kongsan tam namarba tang ki Scheduled Tribe ne ki riewlum trai ri kiba lah ban ïakhun ïa ka elekshon GHADC, Rules 128 ka kren ïa ka jinglong ST na ka bynta ki nongthep vote bad Rule 129 ka ai ka lad ban pynkhreh ïa la ka jong ka electoral roll na ka bynta ka Council- kaba pynduh noh ïa ka jingpyndonkam ïa ka Electoral Roll jong ka elekshon MLA.
Kane ka jingshim rai ka la sdang hadien ba ka GHADC ka la mynjur ïa ka Amendment Bill ha ka 10 tarik Nailar, hadien ka jingïoh ïa ka jingmynjur u Lat ha ka 6 tarik Nailar ban wanrah hapoh ka ïing Dorbar Thaw Aiñ. ïa ka Amendment jong ka Rule 8 ba hashuwa la mynjur da ka Council ha ka 23 tarik Lber mynta u snem.
Ka Amendment ka la mih hadien ba ka ïing Bishar High Court ka jylla kala pyndam ïa ka jingpyn bna jong ka Executive Committee ka GHADC ba pynlong kongsan ïa ka ST Certificate na ka bynta ki kyrtong, halor ka nongrim ba hap ban leh ïa kane lyngba ki lynti kat kum ka Rule. Ka Council ha u Jymmang 2025 ka la thaw ïa ka Committee ban shong bishar ïa ki kyndon pynïaid elekshon bad pynkhreh ïa la ka jong ka electoral roll.
U Myntri Rangbah ka Jylla Conrad K Sangma ula ïai ban ïa ka jingkut jingmut jong ka Sorkar ban ïada ïa ka hok jong ki trai ri trai muluk haba pynpaw ba ka synshar khadar bad ka jingthaw ïa ki policy ka dei ban long kaba don jingkitkhlieh na ka bynta ki jaidbynriew kiba ki dei ban shakri.
Namar ka samoi treikam jong ka GHADC la pynjlan haduh ka 18 tarik Risaw hadien ba la pynjlan ïa ka elekshon ba la buh ban long ha u Iaiong 2026 namar ka jingkulmar kaba jia ha ri-lum Garo, ka jingpynkhreh ïa ka electoral roll ba thymmai kan sa rai mynta ïa ka por ban lah pynlong noh ïa ka elekshon jong ka Council.