Nongstoiñ, Nailur 30: Ka Hynñiewtrep Youth Council West Khasi Hills District, ha ka jingïalam jong u General Secretary samla Wanteibok Lyndoh bad u samla Jeremiah Dkhar Vice President, ki la leit ïakynduh ïa ka Deputy Commissioner ka Hema Nayak IAS, ha kaba ïa dei bad ka jingjia kiba mih lyngba ki social media ba ka don ka jingpan pisa kumba 4 lak ban ïoh ïa ka kam post Staff Nurse ha Maternal & Child Health Hospital, Nongstoiñ.
Ha ka jingïakynduh markhmat na ka liang ka Deputy Commissioner ka la ong ba na ka liang ka District Administration, ka la thung ïa ka kynhun tohkit ba lam khmat da u BDO Bah E.Lyngdoh bad u SP Bah H.Kharkongor. Kane ka kynhun tohkit kan khmih halor ka jingmih lyngba ki social bad kan ap ïa ka jingujor jong kino kino kiba lap ba ka don ka jingbam sap tuh.
Ha kaba ïadei bad kitei ki post ka la ong ba kane ka kam ka dei ka kam contract ka neh tang 6 bnai. Kumta ym da donkam shuh ban khot interview ha jingshisha bad ba ïa kane ka kam la lah ban leh da ka DM&HO Department ban thung kam ym da donkam ban leh na DC office. Hynrei ka ong ba ban ïoh ïa kiba biang ban trei ka la ong ba la shim interview noh na DC ïa baroh ki post kiba I donkam.
Ka Seng ka kyntu ïa ka DC ba kan ïaleh ban leh kloi ban paw noh ki jingshisha haba ïa dei bad ki kynrum kynram thung kam, khnang ba kan nym ktah ïa ki nongthep kam kumjuh ïa ki paidbah, ha kaba ka la kular ïa ka Seng ban leh kloi ha kaba ïadei bad kane.
Ka seng kan nang buddien bad da lei lei kan ym ailad ban jia nangne shakhmat ha baroh ki kam thep kam. Ka Seng ka kyntu ruh sha baroh ba nangne shakhmat lada ka don kano kano ka jingleh thok ha ka thep kam, ki dei ban mih shakhmat ym dei ban ap ïa ki sengbhalang ne ki Seng saiñ pyrthei. Hynrei, dei ban kren ban mih ban pyrshah ïa kano kano ka jingleh bym hok.
Ka Seng ka ai khublei ïa uwei na ki samla ba aplai ïa kane ka kam ba u lah mih shakhmat ban pynpaw ïa ki kam bym hok ha kane ka jingthungkam. Ka seng ka maham ba nangne shakhmat kim dei shuh ban mih kum kine ki kynrum kynram.
