Sngew khia u Myntri ka sorkar jylla halor ka jingdon ki briew hapoh ka district kiba shah ktah ha ka jingpang HIV ha EJHD

La pynlong ia ka Intefrated Health Campaign ha EJHD

0

Khliehriat jylliew 4 : U Myntri ka sorkar jylla, u ba dei ruh u MLA jong ka Khliehriat, myn ha ka sngi saitjaiñ, u la plie paidbah ïa kawei ka prokram kaba la tip kum ka Integrated Health Campaign, kane ka prokram ka long ban ialap sha ki paidbah shaphang ka jingdonkam ka koit ka khiah, ïa kane ka prokram la pynlong ha Khliehriat West Community Hall, ha ka jingdon ryngkat lang u Deputy Commissioner ka East Jaiñtia Hills District, u Abhilash Baranwal, IAS, ka Dr (Mrs). B. Decruse, kaba dei ka Project Director, Meghalaya AIDS Control Society lem bad kiwei kiwei ki heh sorkar.
Haba kren ha ka jingialang, u bah Kyrmen Shylla, u la pynpaw ka jingsngew khia, halor ka jingbun ki briew hapoh ka district kiba la shah ktah ha u khniang HIV, u la khot lang ïa baroh ki tnat sorkar bad kumjuh ruh ki paidbah jong ka district ban ai ka jingiatreilang ban iakhun pyrshah ïa kane ka jingpang, u la kyntu bad pynshlur ïa ki nongshong shnong ba kin leit ban phah test HIV khnang ban dup tip shuh shuh haduh katno ka jingshah ktah ha une u khniang HIV
“Ngan ai ka jingkyrshan ïa kane ka campaign da kaba ngan phah lem ïa ki briew ki ban iarap ki ban trei mon sngewbha kiba na ka Kyrmen Foundation, kata lada donkam”ong u bah Kyrmen, u aimynsiem ruh ba kiba leit phah test kim dei ban sheptieng namar kane ka jingtest ka long jar jar ka ban nym pynbna hano hano ruh lada don ne lada ym don uta u khniang jingpang, kumta u pynshlur ïa ki paidbah ba kin leit phah test.
U A. Baranwal, IAS, u la ong “ Kane ka dei ka sngi ka ban sah jingkynmaw ha ka history jong ka East Jaiñtia Hills District, namar kane ka jingleit ialap sha ki paidbah halor ka koit ka khiah, kan iarap ban kyntiew ïa ka koit ka khiah bad ha kajuh ka por ban iada na ka jingpang HIV ha ka district” u la bynrap ruh ba ka East Jaiñtia Hills District ka dei ka district kaba la kiew bha ha ka jingpang HIV (2.8%), la ong ruh ba ka don ka lad ban sumar ïa kane ka jingpang ha kaba kito kiba don ïa ka HIV ki lah ban im lang kumba im kiwei pat.
U la iathuh ruh ba katkum ka kaiphot ba la ioh lum, ki don haduh 2500 ngut ki briew hapoh ka district kiba im lang bad une u khniang jingpang HIV bad yn dang don shuh ruh namar ki dang bun kiba khlem pat leit leh ïa ka HIV Test, kumta u la ban jur ba donkam ban leit leh ïa ka HIV screening bad ka test bad ban leit phah check up ruh namar ha man la ki district 95 percent ki nongshong shnong ki dei ban leit leh ia kane ka test khnang ban dup tip la ka HIV ka dei ka positive lane negative, ha kajuh ka por u la iathuh ruh ba kin don haduh 63 tylli ki health camp kiba yn leh hapoh ka district, ban bthah ruh ïa ki briew ba kin leit leh ïa ka Test HIV.
Ka Dr (Mrs). B. Decruse, jong ka Meghalaya AIDS Control Society, ka la ong ba ka jingthmu ba kongsan jong kane ka Campaign ka long ban pynshai sha ki paidbah ha kaba iadei bad kiwei kiwei ki jait jingpang ruh.
Ka la ong ruh ba kane ka Integrated Health Campaign ka don ka jingiatreilang bad ka Meghalaya AIDS Control Society, kumjuh ruh bad ka ophis jong u District Medical Health Officer, jong ka District, kumjuh ruh bad ka tnat Social Welfare, ka District School Education , ka Bansara Center, Netralaya Eye Care Center, ka tnat Pulit bad kiwei kiwei ki tnat kaba hapoh ka jinglam khmat u Deputy Commissioner ka East Jaintia Hills District, kane ka campaign ka buh thong ban pyndep ha ki ar spah tylli ki shnong bad 63 tylli ki Static Camp bad yn kham shim khia ïa kito ki nongpang kiba dei ki high-risk, namar ha kine ki Camp yn leh ruh ïa ki test kum ka test HIV, Syphilis, Tuberculosis, Hepatitis B, Hepatitis C, hypertension, Diabetes, Anemia, test ia ki khmat, ki bniat bad iwei kiwei ki jingpang.
Ia kaba kum kane ka Campaign la pynlong ruh ha katei hi ka sngi ha Sutnga CHC, ha kaba ki briew kiba na ka shnong Moopala, Mookympat, Sookilo bad Sutnga ki la wan sha kane ka Campaign, ki la ioh ruh ban pynrung kyrteng ha ka MHIS bad Aadhaar.

Leave A Reply

Your email address will not be published.