Jowai, Jylliew 04: Ka Sarot I man (SIM) kawei na ki kynhun ki 11 ngut shi paralok, shi bynta ban rakhe ïa ka World Environment Day ka ban long ha ka 5:6:2023, mynta ka sngi ki la pynlong da ka jingthung ïa ki tynrai dieng ha ki bynta ka Treriat ka Kiang kaba don hapoh u pud u sam Shnong Panaliar, Jowai.
Hashwa kane la don ka jingïalang ba lyngkot ba la pynïaid da u Shape Pasweth, dkhot ka SIM, la ïoh ka jingduwai na u Kyllimot Lhuid bad ki kyntien ai khublei na u Sienmitre Sumer, na ka liang kane ka kynhuh kala ai khublei kyrpang ïa u sahep Taiwanyoo War, District Soil Conservation Officer (Territorial Division), West Jaiñtia Hills District, uba la pynïoh ïa kitei ki tynrai dieñ.
La ïoh ruh ka jingkren na u ma Riquoma Rq. Laloo, uba la pynkynmaw ba kumno ki mynbarim ki tip lypa ïa ka subjek saian, ki tip kaei ka ban jia lada ki briew kim pynneh pynsah ïa ki dieng ki siej bad ki um ki wah. Ula ong ba ka jingbuh jong ki mynbarim ïa ki ‘Law kyntang bad ki ‘Law mana ka long ba ki kwah ban pynneh pynsah ïa ki khlaw ki btab na ka bynta ka lawei ban wan.
Ha kine ki sngi ka pyrthei hi baroh kawei kala sdang ban kynmaw burom ïa ka Mei Mariang bad ki sawdong sawkun da kaba pynlong ïa ki prokram ban thung dieng. Kumta u kyntu ïa baroh ki dkhot jong ka SIM ba kin pynneh bad don ïa ka mynsiem ieit Mei Mariang.
Na ka liang jong u ma Shape Pasweth, u la ong ba ka pyrthei bad hangne ha ri India ruh kala don ka jingma kaba khraw na ka jingduna jong ka lyer, kumta ula buh ka jingkyntu ïa baroh ki paidbah ba ki dei ban sumar bha ïa ka Mei Mariang bad ki paidbah ki dei ban sumar ïa kito ki dieng kiba la dep ban thung bad ym dei ban shu pynjot pathar ïa ki. Pynkut ka khubor bala pyllait da u ma Jait Da o Sumer dkhot jong ka SIM.
