Shillong, Naiwieng 27: Ka Apex Council Meeting kaba 19 bad ka Annual General Meeting kaba 6 jong ka Meghalaya Cricket Association ka la long ha ka sngi Saitjain, 23 tarik Naiwieng 2024, ha Shillong Club.
Ha katei ka jingïalang la ïoh ban wanlam shakhmat ïa ka kaiphod jong u Honorary Secretary bad u Honorary Treasurer bad la pass da ka ïing. Ka MCA ka la pynkup burom ruh ïa u Sanvert Kurkalang bad u Lakhan Singh kiba la pynbna dang shen ban shongthait noh na ka jingbishar ïaka kriket jong ki shynrang ba la rangbah ba la pynïaid da ka BCCI.
Ha katei ka sngi la ïoh ruh ban shim ïa katto katne ki rai kiba kongsan ha kaba ïadei bad ka jingjied ïa ki player na bynta ka kynhun ïalehkai ka Jylla, ka jingbit jong ki nongïalehkai, ban ïakren shaphang ki lympung kiba kham rit kyrdan bad kiwei kiwei ki mat.
Ki rai ba kongsan ba la pdiang:
1. Na bynta ki nongïalehkai ba thymmai kiba kwah ban mihkhmat ïa ka Meghalaya, ka jingïohrung ka long naduh ki lympung kyrdan ba rit, kata ha ki kyrdan Junior (haduh 19 snem), lyngba ki lympung lehkai inter-district jong ka MCA lane kiwei pat ki prokram ai jinghikai (coaching camp) ba la pynlong da ka MCA ha ki kyrdan junior kan long kaba donkam ïa uno uno u player.
2. Kaba rung kyrteng ha ka kynhun khlem da ïalehkai ha ki lympung kyrdan ba rit jong ka Jylla/BCCI yn nym lah ban pdiang. Shuh shuh, yn bthah ruh ïa ki district unit ba ladep ïasoh (bad ka MCA) ban pynlong ïa ki inter-school bad kiwei pat ki lympung ha ka kyrdan U-12 bad U-14 naduh u snem 2025-26.
3. Ban ïoh mihkhmat ïa ka Meghalaya, ki player ki dei kiba la kha, bad ki nongshong shnong ba pura jong ka Jylla. Lada em, ki kmie ki kpa jong U/Ka ki dei kiba la kha, bad ki nongshong shnong ba pura jong ka Jylla.
4. Lait na ka rai nombar 3 ba la kdew haneng, katkum ki kyndon jong ka BCCI yn sa pyrkhat ruh ïa ka jingbit jong ki nongïalehkai ba shabar lada donkam.
5. Ka MCA kan pynbna ruh ïa ka snem ba la pynjari na bynta kito kiba kwah ban ïalehkai na ka Meghalaya, ka ban kynthup haduh kiba la kot 35. Kane kan treikam naduh 2025-26. Ki player kiba la palat ïa ka rta ba la buh ki lah ban shongthait noh bad ki ïoh ïa ka lad ban trei kum ki nonghikai (trainer), coach, bad kiwei kiwei ki kam, da kaba pyndonkam ïa ka jingshemphang jong ki na ka bynta ka jingmyntoi ïa ka kriket ha ka jylla.
6. Yn bthah ruh ïa ki synjuk Distrik kiba ladep ïasoh ïalade ba kin shimkhia ïa ka rukom jied bad ban pynshisha pura ïa ki nongïalehkai kiba mihkhmat ïa ki distrik bapher bapher lane ïa ki kyrteng ba ki phah sha ka MCA na ka bynta ki jingpyrshang jied player jong ka jylla.
7. Ka MCA kan pynlong ïa ki lympung ïalehkai inter-district (junior) na ka bynta ki khynnah shynrang bad kynthei ynda la kut ka samoi ïalehkai jong ka BCCI hapoh ka ri.
8. Ia ka madan kriket jong ka MCA ha Polo, Alotgre bad Nongkhrah yn pyndonkam na ka bynta kum kine ki lympung tang mar ïa kut ki samoi lehkai jong ka BCCI bad shuwa ban sdang u slap.
9. Hadien ba la khmih bad bishar ïa ki kam jong ka Eastern West Khasi Hills District Cricket Association kaba thymmai, la shem ba ka dei hok ban ïoh ïa ka kyrdan ban long dkhot ba pura jong ka MCA naduh u snem 2025-26, kaba pyndep ïa ki jingbthah bad ki aiñ jong ka MCA kumba la bthah ha ka Riti Synshar 2020 jong ka synjuk.
10. Yn pynshitom da kaba tyngeh ïa ki nongïalehkai kiba leh ïa ki kam kiba long pyrshah ïa ka MCA ne BCCI, la kadei kaba shu kynthoh da ki kyntien, ha ki rynsan social media lane lyngba ki kam kiba la pynshisha ba ki long kiba pyrshah. Yn thaw ïa ka komiti kaba kyrpang ban shna ïa ka polisi kiba bñiah na ka bynta ka jinglong jingman ki nongialehkai, bad kiwei kiwei.
11. Ka MCA kan shimkhia ruh ha ka ban kyntiew ïa ka Madan Kurkalang ha Ri-Bhoi. Ka jingpyntrei kham kloi ruh ha kaba ïadei bad ka jingshna bad pynïeng ïa ka kynroh, ka jingpyn ryntih ïa ka madan.
12. Ka MCA kan thaw ïa ka buit (blueprint) ban kyntiew bad pynpawnam ïa ka kriket naduh ki kyrdan ba kham rit shaneng ter ter ha ka rukom kaba la buh ryntih ryngkat bad ki jingtei kiba ïadei. Kane ka mat treikam kan kynthup ïa ka por ba lyngkot (3 snem) bad ka por ba jrong (5 snem) kiba kynthup ïa ka rukom treikam kaba pura.
13. La pynbiang ruh ïa kawei pa kawei ka distrik da ki kor kompiwtor na ka bynta ban buh jingthoh ba bñiah ïa ki nongïalehkai, khamtam ha kaba ïadei bad ka BCCI kaba dei ban khmih bad bishar ïa ki player da ka app bad ban buh jingthoh ha kaba ïadei bad ki kam jong ka distrik.
