Shillong, Naiwieng 27: Ka Meghalaya Gymnastics Association (MGA) ha ka 23 tarik Naiwieng, 2024 ka la ïoh ban pynlong ïa ka Annual General Meeting ha Arts & Culture Seminar Hall, State Central Library ha kaba ïa kane ka jingïalang la pynïaid da u President, Bah Francis Marwein. Ha kane ka jingïalang la ïoh ban ïakren halor ki mat bad ki jingseisoh kiba kane ka synjuk ka la ïoh mad bad nalor kata, ka synjuk ka la pynthymmai ruh ïa ki dkhot nongkitkam na bynta u 2024-2027.
Kine ki long ki kyrteng jong ki dkhot nongkitkam kiba la shah jied na ka bynta ka por kaba lai snem ka ban treikam naduh u mynta u Naiwieng 2024-2027: Bah Francis Marwein – President, Jibonsing R. Marak-Working President, Filing A Thangkhiew – Vice President, Lucy M. Malngiang- General Secretary, Plishanri Lyngdoh-Joint Secretary, Idaline Malngiang -Joint Secretary, Natalie Nongrum –Treasurer, Francis A. Khongwar- Publicity Secretary, Ridahunlin Lyndem- Executive member, Joseph Pasi-Executive member, Conniefer Kharchandy -Executive member, Wanmishisha Kharpan -Executive member, Nidawanbiang Pasi -Executive member bad ka Indarishisha Dkhar-Executive member.
Ka jingïaid lynti jong ka synjuk ha kine ki snem ba ladep: La phah ïa ki hynñiew ngut ki samla ïalehkai Gymnast jong ka MGA sha Manipur ban leit shah hikai ha ka Coaching Camp ba la pynïaid da ka Manipur Gymnastics Association kaba la long naduh ka 20 haduh ka 31 tarik Kyllalyngkot 2020.
Wat ha ka por jong ka khlam ha u snem 2021, ki khynnah samla jong ngi ki la lah ban ïashim bynta ha kiba bun ki jingïakop Virtual Gymnastics. Ha ka Invitational Meet 2021,” ba la pynlong da ka Achievers Gymnastics Academy Nagpur, Maharashtra ha ka 28 – 29 tarik Nailar, 2021, ka MGA ka la khur 10 tylli ki takma.
Ha ka rynsan ïakop – Gymnastics Meet-2021″ ba la pynlong da ka J.M Sports Academy, Bhubaneswar Odisha, ha u Naitung 2021, ki khynnah lehkai gymnast jong ka MGA ki la jop takma ksiar ha ka kyrdan Under 10, ka kyrdan ba sdang jong kane ka jingïakop. Ha ka “Invitational meet” ba la pynlong da ka RnR Fit Gymnastics Academy Bangalore ha u Jymmang 2021, ka MGA ka la khur ïa 2 tylli ki takma rnong.
Ka ‘Active Mantra Artistic Gymnastics Championship 2020-21 ba la pynlong da ka Standard Mantra Education & Social Welfare Society, New Delhi naduh 21 haduh 24 tarik Rymphang 2021, ka la MGA ka la jop ar tylli ki takma ksiar, kawei ka rupa bad 3 tylli rnong.
Kum shi bynta ban pynbit pynbiang ïa ki jingdonkam ki nongïalehkai gymnast ka jylla ban kyntiew bad pynjanai ïa ka sap jong ki, arngut ki dkhot ka synjuk (MGA) ki la shah pyntbit kum ki Assistant Coach na ka National Institute of Sports Centre kaba don ha Aurangabad, Maharashtra. Ha u Nailar 2022 ki khynnah ïalehkai Gymnast jong ka synjuk ki la shimbynta ha ka Invitation Gymnastics Championship kaba la long ha Manipur. U Bakmenhun Shangpliang u la khur 2 tylli ki rnong ha ka Floor Exercise bad Balancing Beam, katba ka Josephine Warjri ka la jop takma rupa ha ka Vaulting Table. Kiwei pat ki kam ba ka MGA ka la shimkhia ka long ka Gymnastics Coaching Camp kaba la pynlong hapoh u Coach Baleshwar ha Shillong ha u Rymphang 2023.
Ka MGA ka la sei ruh 5 ngut ki nongïalehkai gymnast ban ïakhun ha ka Sub Junior Artistic Gymnastics Championship kaba la long ha Kolkata naduh16-19 tarik Rymphang 2023. U Amar Nath, Gymnastics Coach na Assam u la sdang ïa ka prokram ai jinghikai naduh u Nohprah 2023 haduh u Kyllalyngkot 2024 na bynta ka 5th Meghalaya Games 2024 ha Tura, ha kaba 5 ngut shynrang bad 26 ngut kynthei ki la shimbynta. Ki la don ruh 5 ngut ki khynnah lehkai gymnast ba shimbynta ha ka Sub Junior Boys & Girls Artistic Gymnastics National Championship na bynta u snem 2023- 2024 ha National sports Academy, Khel Gaon Public School, Prayagraj , Uttar Pradesh, ha u Lber 2024.
Kawei na ki sienjam ba sah jingkynmaw ïa ka MGA ka long ka jingsoi ia ka soskular – Memorandum of understanding (MOU) hapdeng ka Meghalaya Gymnastics Association bad ka St. Anthony’s Higher Secondary school, Laitumkhrah, na ka bynta ban ai jinghikai ïa ki khynnah samla ha ka gymnast. Ka synjuk (MGA) ka la thung ïa u Arjun Singh Khwairakpam ban long Coach Gymnastics ba pura u na ka bynta ban ai jinghikai man ka por ïa ki samla ïalehkai Gymnast.
Saw ngut ki khynnah lehkai Gymnast ka Meghalaya ki la ïasoh bad ka State Level Rhythmic Gymnastics Coaching Camp ha Nagaon, Assam kaba la sdang naduh 2 haduh 10 tarik Naitung, 2024 ba la pynlong da ka Assam Gymnastics Association. Ka SAI, Jalpaiguri, West Bengal, ka la pdiang ruh ïa ar ngut ki khynnah lehkai gymnast na ka bynta ki jinghikai ba man ka por.
