Mawkyrwat, Lber 19 : Katba nang mih ki sngi ka jingdumon jong ki riew shim kabu ka la nang jyllei ha kaba ka la don kawei ka jingjia ha ka thaiñ Warsan Lyngdoh ba ki la don ki ‘riew shim kabu ki bym don shuh ka mynsiem ïa tip lem ha ka imlang sahlang da kaba ki la ban pynpra dusmon ïa ki mawkynroh rel ha ka surok PWD shnong Pynden Umjaraiñ, South West Khasi Hills District.
Ha ka tyllong khubor ba la ïoh lum kaba ïa dei bad katei ka jingjia la ïathuh ba kane ka jingjia ba shah pynpra ki maw kynroh rel ka dei ha kine sngi ba la dep bad ka jingjia shah pynpra dumon ka dei beit ha ka surok PWD (Roads) kaba hapoh ka jingpeit jingkhmih jong ka PWD (Roads) jong ka Ranikor Division. “Ki briew ki bym lah ïathuh ki la bom bad pynpra dusmon ïa ki mawkynroh rel ha ki bynta ba dei jong baroh ar liang ka surok bah”, ong ka tyllong khubor bad ym tang kata kine ki maw kynroh rel ki dei ruh ki jingtei ba dang shu dep maramot ba ki la jot katkum ka jingbthah napoh ka ophis PWD (Roads).
Namarkata, na ka liang ka shnong Pynden Umjaraiñ ha kaba ïa dei bad kane ka jingjia ka pynpaw ïa ka jingsngewsih kaba khraw halor ka jingleh riewkhlaw jong katto katne ngut ki briew bad ym tang kata kum kine ki jait jingjia ka shnong ruh ka la maham tyngeh ba lada lap ïa kiba don kti ban pynjot ïa kitei ki maw kynroh rel kin sa shah pynngat ha ka jingshah pynshitom.
