Nongpoh, Ïaiong 29: Ki don ki nongrep kiba kyrshan ïa ka ïing ka sem lyngba ka kam ri syiar ki la pynpaw ïa ka jingsngewkhia kaba jur, kaba dei halor ka jingshah ktah na ka jingpylip bording ilektrik ba khah khah ka tnad MeECL, namar haba ri ïa ki syiar ki donkam ban don ïa ka bor jingshai jong ka bording ilektrik.
Kumba la pynpaw da ki Nongri Syiar, haba ka ri syiar ki donkam ïa ka bor jingshai jong ka bording ilektrik khamtam ki khun syiar bad ruh ki syiar kiba pynkha pynlleng, hynrei kane ka jinglip bording ba khah khah bun na ki khun syiar ki ïap noh na ka daw ba kim ioh ïa ka jinsngaid jong ka bording ilektrik.
Kine ki nongri syiar kiba la pynpaw ïa ka jingsngewkhia halor kane ka jingshah ktah na ka jinglip bording ilektrik, ki dei ruh ki nongrep ba ri syiar na ka thaiñ Sohnidan ha Ri Bhoi, ha kaba ki la pynpaw ba na ka daw ka jingdon kane ka load shedding bad ka jinglip bording ieltrik ba man ka por jong ka bording ilektrik ka la ktah shisha ïa ki kum kita ki nongri syiar ba ki donkam ban pynheh pynsan ïa ki syiar da ka bording ilektrik bad lada ym don ka bording jingshai ka bording ilektrik bun ki khun shiar ki shu iap noh kaba long ka jingduh jingmyntoi ïa ki kum ki nongri syiar.
Kumba la ïathuh da u General Secretary ka Hills Farmer Union, u Bah Allfondbirth Kharsyntiew, la ong ba kitei ki nongri syiar ki la ud la nam sa ka seng bad khamtam ki la ri ïa ki syiar ruh da ka jingïarap ka seng ban shim ram na ki Bank, hynrei haba ym don bording ilektrik ki khun syiar ki ïap noh bad wat ki syiar ba kha pylleng ruh ki shah ktah tang na ka daw ka jingbym biang ka bording ilektrik.
Namarkata, ka seng ka dap da ka jingsngewkhia halor kane ka jinglip bording ba khah khah nalor ka jingpynlip bording ka nad MeECL (Load shedding) bad kum ka seng kaba peit kyrpang ïa ki nongrep ka dawa na ka sorkar ba kan phai khmat kyrpang sha kine ki nongri syiar bad khamtam ban thaw lad thaw lynti ban pynbiang ïa ka bording ilektrik ba ka jinglip bording ilektrik ka ktah ym tang ïa ki nongri syiar, hynrei ka ktah lut ïa baroh ki kam ki jam ha kaba ha ka juk stad mynta ngi donkam man ka khyllip mat ïa ka bording ilektrik, u la bynrap.
