Nongpoh, Ïaiong 29: Ki paidbah Nongshong Shnong ka shnong Umroi Nongrah ryngkat ki riew rangbah mynta ka sngi ki la pynpaw ïa ka jingpyrshah jur halor ka jingthmu u rangbah Shnong ban die ïa kawei ka Pung shnong hapoh ka Shnong Umroi Nongrah ba bun na ki paidbah bad ki riew rangbah kim don jingtip satia halor kane ka kam ban die ïa katei ka pung shnong. Kum ka jingpyrshah halor kane ka jingthmu ban die ïa katei ka Pung Shnong, ki riew rangbah jong ka shnong mynta ka sngi ki la mih ban leit jurip ïa katei ka pung ha kaba ki la pynieng ruh da ka Signboard kaba ki la mana ba ki pyrshah jur ban die ïa katei ka pung bad mana ruh ïa kino kino kiba thmu ban thied kim dei ban thied ïa katei ka pung khlem da ioh jingbit na ki paidbah bad ka Dorbar Shnong.
Ki paidbah ki la pyrshah jur ruh halor kane ka kam, ka dei hadien ba la kynnoh ba u rangbah Shnong u Bah Baïateilang Lapang u la thmu ban die ïa katei ka pung shnong khlem da tip ki paidbah bad wat ki dkhot ka Executive Committee jong ka dorbar Shnong.
Haba kren sha ki Nongthoh Khubor, u Bah P. Dkhar, Rangbah Shnong barim ka Umroi Nongrah bad u Bah Jewel Lyngdoh Nonglait, ki la ong ba kum ki paidbah bad ki riew rangbah ki da pyrshah jur halor kane ka jingthmu u Rangbah Shnong ban die ïa katei katei ka pung Shnong.
Ki la ong ruh ba da lei lei kin nym ailad ban die ïa kane ka Pung Shnong, kaba dei ka nongkynti jong ka shnong bad shuwa ban shim ïa kano kano ka rai ki dei ban da khot shuwa ïa ka Dorbar Shnong bad dei tang ki paidbah kiba lah ban ai rai la ka dei ban die ne ym die ïa katei ka Pung bad ban shu leh sop sop khlem da tip ki paidbah kum ki rangbah bad ki paidbah kin nym lah satia ban pdiang.
Kitei ki riew rangbah ka shnong lem bad kiwei ki riew rangbah ka shnong ki la kynnoh ruh kumno u Rangbah Shnong un shu shim rai marwei, ha kaba wat ki dkhot ka executive committee ka shnong ruh kim don jingtip satia bad lada ki don kum kane ka jingthmu ki dei ban khot da ka Dorbar khnang ba ki paidbah hi kin shim ïa ka rai ha kaba katei ka jaka ka dei ka nongkynti jong ka shnong bad ym jong ki riew shimet.Namarkata, ki la buh ruh ka jingmana ïa kino kino kiba thmu ban thied ïa katei ka Pung ba ki dei ban wan jingtip shuwa da kaba thikna bad lada ki thied ïa katei ka pung khlem da tip lang ka Dorbar Shnong ki hap ban shim hi ïa ka jingkitkhlieh lada ki paidbah ki pyrshah ban long trai ïa katei ka pung, ki la bynrap.
