Ai jingkhublei kitbok kitrwiang u bah Kyrmen Shylla ïa ki khun ka Seiñ Raij shnong Mukhaïalong ha ka Shad Sukra

Khliehriat ïaïong 29: U bah Kyrmen Shylla, uba dei u MLA jong ka Khliehriat, kumjuh ruh u myntri ka sorkar jylla, haba kren kum u kongsan ha ka shad sukra kaba long ha shnong Mukhaïalong East Jaiñtia Hills District mynta ka sngi, u la ai khublei shad sukra ba suk ba kmen, u la pynpaw ruh ka jingsngew kmen ban ïadon ryngkat lang bad ki Khun ka Seiñ Raij Shnong Mukhaïalong ha kum kane ka sngi, u la ai ka jingkhublei kitbok kitrwiang ba kin man bha ha ka rep ka riang, ha ka kamai kajih, kumjuh ruh ba kin nang ïoh ka met ba koit ba khiah.
Kiba la ïa don ryngkat lang ha kane ka sngi ha shnong Mukhaïalong, ki kynthup ruh ki ar ngut ki Symbud Kongsan, u Deputy CEM jong ka Jaiñtia Hills Autonomous District Council, u bah Lasky Rymbai bad u bah Francis Swer, uba na shnong Khliehriat, kumjuh ruh u Waheh Shnong Mukhaïalong, u bah Hundred Phawa, ki riew rangbah jong ka shnong, ki longkmie long kpa, ki khun samla, ki khynnah rit jong ka shnong.
Ha kaba kum kane ka sngi, ki khun jing ka Sieñ Raij shnong Mukhaïalong ki dap da ka dur ba phuh mut phuh mat ba mynta ka la dei ka aiom shad suk Kara, shad mastieh, kaba dei kawei na ka jingleh niam kaba naduh ki por u men barim, ki la ïa wan ruh ban ïa shim bynta lang ha kane ka jingshad Sukra ba la pynlong hapoh shnong.
Kum ban shu pynkynmaw biang, mynta u snem 2023, ki don haduh ar phew hynñiew tylli ki jaka ba la pynlong bad kiba yn sa pynlong ia kane ka shad sukra da ka Seiñ Raij Tuber, kaba na East Jaiñtia Hills District.
Ïa kane ka shad suk kara la sdang naduh myn ka 9 tarik mynta u bnai ïaïong, kaba dei ka sngi Pynsiñ bad ïa kane la dang da ka Seiñ Raij Tuber bad bud pat sa ki Seiñ Raij Shnong bapher bapher bad yn pynkut haduh ka 20 tarik u bnai jymmang 2023, ka long ruh kaba sngew tynnad, sngew bang ban iohsngew ïa ki sur shad sukra kiba mih na ka Sieñ Raij Tuber bad na ki Seiñ Raij Shnong bapher bapher, kaba pyndap shisha ïa ka mariang sawdong da ki sur bathiang, ha ryngkat ka shad ka kmen, kumjuh ruh ki da pyndep ïa ki jingleh niam, leh rukom kumba la maitphang da ki longshwa, kata hashwa ba kin leit hiar sha ki lum ki lyngkha ban bet ïa ki symbai.
*Khyndiat shaphang ka jingleh niam Shad Sukra bad shad Pastieh*
Kane ka jingleh niam Shad Sukra ka dei kaba ki ju leh ha ri lum Jaiñtia naduh ki por u men barim, ïa kane ki ju sdang ban leh man la u snem naduh ka ka taïew ba khatduh jong u bnai lber haduh u bnai ïaiong bad la sdang ïa kane da ka Seiñ Raij Tuber ha kaba la sdang shwa da ka kñia Ryngkaw nangta pat ha ka sngi Hat (sngi ïew) lane ka Kyllaw la pyndep ïa ka kñia ryngkaw ha kaba baroh ki khun ki hajar jong ka Seiñ Raij Tuber kim dei ban leit trei leit ktah ha kane ka sngi Kyllaw, u Lyngdoh, ka Lyngdoh, ki Wasan baroh ha kane ka sngi ka dei ka sngi sum sngi sait jong ki bad ha kane ka sngi Kyllaw ha ka ka por shiteng synia mynmiet u Lyngdoh bad ki Wasan ha ka por kumba 1 baje mynmiet ki pyndep ïa ka kñia Shathoh, ïa kane ka kñia ki ju leh ha ka Iung Blai Lyngdoh ha Tuberkmai Shnong, hadien kane ha ka por synia por kumba 1 baje mynmiet u Lyngdoh u shim ïa u symbai bad u bet ha lyngkha kum ka dak ban pyndep shwa u Lyngdoh ïa ka jingbet symbai bad ha ka por mynsngi ha kaba ïa ka kñia ruh lah pyndep bad ïa ka jingbet symbai ruh lah pyndep kin sa pynlong ïa ka shad Sukra.
Ki khun shnong Bri shnong Khyndaw (kaba mut ki khun ki hajar kito ki bym dei na shnong Tuber) la ju khot da ki Sein Raij Shnong, kine ki Sein Raij Shnong ki lah ban leh ïa kane ka leh niam bad ka shad Sukra dei ynda la dep leh shwa u Lyngdoh jong ka Sein Riaj Tuber ha ka Iung blai.
Kumba ju long man la u snem, ha ka sngi kaba nyngkong u Lyngdoh u leh ïa ka kñia ka khriam, ha ka sngi ba ar pat ka dei ka sngi ban sum ban sait bad ha ka sngi ba lai ka ju sdang ka shad sukra da kaba ki ju wan bad ia poi lut baroh ki khun ki raiot jong ka Raij Tber bad hadien kane u Lyngdoh u pynbna ba lah biang ka por ban bet noh ïa ki symbai sha ki jaka rep bad ha kane ka sngi la ju pyndep ruh ïa ka Shad Pastieh ha Tuberkmai shnong.
Kane ka Shad Pastieh pat ka mut ba u Ryngkaw hadien ba la dep leh niam ha ka kñia ka khriam ba ju khot ka kñia Ryngkaw, lada ka pyni ka ka dak kaba bha ba miat hangta kin sa pynlong ïa kane ka shad pastieh kaba ki ju shad da ka waitlam bad ka stieh ha kaba ki ju rah lang ruh ïa kata ka wait pom blang bad hadien kane kin sa hiar sha la ki jong ki jaka rep ban bet ïa u symbai.