Plie u Bah Paul Lyngdoh ïa ka lympung king lieng North East Regatta, shi bynta ban kyntiew ïa ki kam jngohkai pyrthei
Nongpoh, Ïaiong 29: U Bah Paul Lyngdoh kum u myntri ka sorkar jylla ba dei peit ïa ka kam jngohkai pyrthei (Tourism) mynta ka sngi u la leit ban plie paidbah ïa ka ‘North East Regatta, kaba dei kawei na ka tamasa ïa kop kieng Ling ba la pynlong da ka tnad Tourism jong ka sorkar jylla.
Ïa kane ka tamasa ïa kop kieng Ling ba saw sngi la pynlong ha Umiam Sports Complex ha Ri Bhoi, ha kaba u Bah Paul Lyngdoh u la wan ban plie paidbah ïa kane ka lympung kum u kongsan bad la sakhi lang ruh da ka jingdon lang u DGP ka Meghalaya, u LR Bishnoi, ki ophisar na ka tnad Tourism, ki nongjngohkai pyrthei bad la pynshongshit ruh da ka jingdon lang u Kim Woo-jin, uba dei uwei na u nongrwai ba paw na ka ri South Korea.
Kumba la pynpaw, ha kane ka North East Regatta kaba la sdang mynta ka sngi bad ka ban pynkut noh ha ka 2 tarik u Jymmang 2023 kin don shibun ki jingïakop kum ka jingïakop kieng Ling bad kiwei kiwei ki jingïakop ba la wan shim bynta na kylleng ka ri India.
Haba kren sha ki Nongthoh Khubor hadien ka jingïalang plie jong kane ka Tamasa ïa kop kieng Ling, u Bah Paul Lyngdoh, Myntri ba dei peit ïa ka tnad jong ka kam jngohkai pyrthie ha ka jylla, u la ong ba la pynlong ïa kane ka North East Regatta, ka dei shi bynta ban kyntiew ïa ki kam jngohkai pyrthei, namar ka kam jngohkai pyrthei ka dei kawei na ka kam kaba lah ban kyrshan ïa man la ki longïing hapoh ka jylla.
U la ïathuh ruh ha kane ka North East Regatta kin don shibun ki jingïakop kum ka jingïakop kieng Ling bad kiwei kiwei ki jingïakop ba la tip ha ka ktien nongwei, Sailing, Parasailing, Paragliding, River bad Lake Cruise kaba long shi bynta ban khring ïa ki nongjngohkai pyrthei na kylleng ka ri India.
U la ong ruh ka sorkar jylla kan shim khia ban dang kyntiew ïa ki kam jngohkai pyrthei hapoh ka jylla ha kaba lyngba ka kam jngohkai pyrthei kan ïarap ban kyntiew ïa ka khajna jong ka sorkar bad khamtam ban kyntiew ïa ka ioh ka kot jong ki paidbah da kaba ngin khring ïa ki briew kiba nabar ban wan sha kane ka jylla ban wan pynlut por ha ki kam jngohkai pyrthei hapoh ka jylla.
Shuh shuh, u la bynrap ruh da kaba ong, ba ka sorkar jylla lyngba ka tnad Tourism kan shim khia ban pynlong ïa kum kine ki jaid tamasa namar ka jingwan jong ki nongjngohkai pyrthei ym tang ba kin shu shong sah ha ki jaka sorkar, hynrei kin ioh lad ruh ban shim bynta ha kum kine ki tamasa kiba long ki lad ki lynti kumno ban kyntiew ïa ka ioh ka kot ki paidbah lyngba ka kam jngohkai pyrthei hapoh ka jylla, u la bynrap.