Lahduh ka St. Dominic College ha ka jingïakop shut jabieng ka Seng Khasi College

0

Shillong, ïaïong, 29: Ki samla pule jong ka St Dominic’s College ki la ïoh rah ïa ka nam kum ki lahduh ha ka jingïakob shut jabieng ïa kaba la pynlong ha ka sngi Saitjaiñ da ka Seng Khasi College kaba don hapdeng ka jingrakhe ïa ka Jubili Ksiar jong ka jingseng ïa kane ka shlem pule ha kane ka jylla.
Ïa kane ka jingïakob la pynlong hapoh ka Hall jong ka Seng Khasi Higher Seconadry School, Jaïaw, Shillong ha kaba u Asst General Secretary jong ka Seng Khasi Kmie u Bah Païa B Synrem u la long kum u Kongsan, ha ryngkat ka jingsakhi lang jong u Principal ka College u Bah W.B Rynjah bad kiwei kiwei.
Ïa ka jingïakob la pynlong ha ki 10 tylli ki wat ba kynthup ïa ka Lucky Star, Famous People, MCQ, Beautiful Places, Current Affairs, Meghalaya, Risk & Rewards, Maps, Sports, bad Entertainment la pynïaid da u Bah Batskhem Rapsang.
Ha kaba kut jong ka jingïakhun, ka St Dominis’c bad ka St Edmunds ki la ïoh ban khur mar katjuh ka point bad khnang ban lah ban ïoh pat ïa ka rai lahduh , u nongpynïaid u la wan shakhmat ban ai ïa kawei ka jingkylli ba donkam ban ïa jubab hapdeng kine ki artylli ki College, ha kaba la lap ba lah ban jubab kloi noh da ki shi jur ki samla ka St Dominic’s College.
Ïa ka namjop kumba la kdew haneng la rah da ki shi jur ki samla pule jong ka St Dominic’s College hadien ba ki la ïoh ba kin khur 46 point, ba-ar St Edmund’s College kaba la ïoh khur 45 point bad ka Mawlai Presbyterian College kaba la ïoh ban khur 25 point ka la poi ha ka kyrdan kaba lai.
Ha kane ka sngi, la sam ruh ïa ki khusnam sha ki nongjop da u kongsan u Bah Païa B Synrem.

Leave A Reply

Your email address will not be published.