Shillong, ïaïong, 29: Ki shipai Border Security Force kiba la ïoh ïa ka jingtip kaba bniah na ki tnat syntiat ha ka sngi Palei ki la ïoh kurup ïa ka jingtah khmat Skin Shine cream kaba shongdor T. 31 lak na khappud jong ka East Jaintia Hills hadien ba la pynpulom ïa ka jingpyrshang jong ki runar ban shalan tuh sha ka ri Bangladesh.
Ïa kine ki tiar ki shipai BSF jong ka 172 Battalion kiba ap pahara ha Hangaria Border Out Post, East Jaintia Hills, ki la ïoh kurup na kawei ka jaka ba la buhrieh ha khlaw ïa kiba la thmu ban shalan tuh sha ka ri Bangladseh.
Hadien kane, ïa kine ki tiar la aiti noh sha ki Pulit ka tnat Custom ban leh ïa kaba donkam.
Naduh u bnai Kyllalyngkot, 2023, ki shipai BSF ki la ïoh kurup ïa ki jingsleh durkhmat kiba kot palat 97 lak na khappud Indo-Bangladesh jong ka jylla Meghalaya.
