Weng noh uwei na kiwei ki party na ka bos, pynrung bujli da u Bah Samlin : President NPYF
Shillong, Ïaïong 29 : U President ka National People’s Youth Front (NPYF) Bah Kitborlang Nongrem ha ka sngi Saitjaiñ u la kyrpad ïa ki bor bahalor ba kin weng noh uwei u dkhot na kawei pat ka party bad pynrung bujli noh da u Bah Samlin Malngiang hadien ba u la jop biang kum u MLA ka Sohïong.
Ïa katei u Bah Nongrem u la kren ha ka jingïalang ïalap elekshon jong ka party kaba long ha Rangshken ban pan jingkyrshan na bynta u kyrtong ka party Bah Samlin Malngiang.
Katei ka jingkren jong u ka thew ban dawa na ki bor ba halor ba kin weng noh uwei u Myntri sorkar na kawei pat ka party bad ban pynrung noh ïa u Bah Samlin ha jaka jong u.
Shwa kane, u Bah Nongrem u la ong ba ki lyngoh ban ïohi ba kat shaba leit kiwei ki party ki leit ban kynthoh ba ki paidbah Meghalaya kim don shuh ka jingshaniah ïa ka NPP.
“Hynrei ha kane ka elekshon ba la dep ka NPP ka la ïoh haduh 31.49 persen (khlem pat kheiñ ïa ka Sohïong) ka jingdon ki nongthep vote ba thep ha ka NPP. Bad dei kane ka party kaba ïoh bun tam ka jingdon ki nongkyrshan ha ka elekshon ba la dep,” u la ong.
Shuh shuh u ong ruh haba phai pat sha ka UDP kaba jop 11 ngut ki MLA, katei ka party ka la ïoh tang 16 persen ka jingdon ki nongkyrshan.
Nalorkata u ong ruh ba ki MLA ka UDP naduh ka snem 2018 – 2023 ki ju Ïaroh ïa u Bah Prestone Tynsong bad Conrad K Sangma kum ki nongïalam ba tbit ka jylla. “Hynrei mynta pat ha Sohïong haba ki kren ki kynnoh ba ka NPP ka ïalam na kaba sniew sha kaba kham sniew,” u la bynrap shuh shuh.
Haba bynrap lang, u kyrtong ka NPP na Mawphlang ha ka elekshon ba dang shu dep, Bah Kennedy Khyriem u la ong ba kum u kyrtong u sngewthuh ba ka kthang haba mad ïa ka nam rem. “Ban rem elekshon shisbnai ruh pat bang ja. Kumta nga kyntu ïaphi baroh ban trei borbah khnang ba ngin ïoh ïa ka jingjop,” u la ong.
Ha kane ka jingïalang ïalap elekshon la tuid da ki hajar ngut ki nongkyrshan na kylleng ka constituency ryngkat ka jingdonlang ki nongïalam ba hakhmat ka party kynthup naduh u kyrtong Bah Samlin kumjuh u National Vice President ka Party Bah Prestone Tynsong ba dei ruh u Symbud Myntri Rangbah ka Jylla.