Nongpoh, Rymphang 09: Kam dei ka sien kaba nyngkong ba ki paidbah nongshong shnong ka thaiñ byrnihat bad wat ki khynnah skul ki ju pynpaw jingeh ba ki shah ktah na ka jingsma bad ki jaboh ba mih na ki Karkhana ba don ha Byrnihat, hynrei kane ka jingshah ktah ka ju jia beit man ka por ha kaba bun ki paidbah nongshong shnong ki ju ud ki ju nam naki jingsma bad ki jaboh kiba mih na ki Karkhana kiba don ha Byrnihat ha Ri Bhoi District.
Kum ban pynkynmaw, ka Byrnihat ha Ri Bhoi District ka dei kawei na ka jaka ba bun bha ki Karkhana bapher bapher ba la wan ban pyntreikam ha katei ka thaiñ bad la tip ruh kum ka Meghalaya Export Promotion Industrial Park, kiba hap ha ka jingpeit jingkhmih ka sorkar Meghalaya.
Haba kren halor kane ka jingdon kine ki Karkhana, lehse kiba bun ki paidbah ka jylla ki khmih lynti ban don kata ka jingiohnong na ka bynta ka Khajna ka sorkar jylla bad ruh ha ka liang ka ioh kam ioh jam bad phewse kane ka long da khongpong ha kaba ki paidbah nongshong shnong kaei kaba ki ioh jingmyntoi ka dei tang ka jingring mynsiem da ka lyer jaboh bad ruh ki jingsma iwtung kiba mih na kitei ki Karkhana kiba don ha Byrnihat.
Katkum ka khubor ba la ioh lum mynta ka sngi, ka la don ruh ka jingshah ktah ki paidbah ha ka thain Harlibagan ha Byrnihat kaba dei na ka jingmih ka jingsma iwtung na ki Karkhana bad ïa kane la sakhi ruh ba ka jingshah ktah kam dei tang ïa ki nongshong shnong bad ka la ktah ruh wat ïa ki khynnah skul ka Don Bosco Higher Secondary School, Byrnihat.
La ioh jingtip ruh ba ka Don Bosco Higher Secondary School ka dang pynkhreh ban pynlong ïa ka Sport meet ki khynnah bad mynta ka sngi ki khynnah ki dang pynlong ïa ka jingpynkhreh na ka bynta katei ka sport meet, hynrei na ka daw ka jingmih ka tdem bad ka jingsma iwtung na ki Kharkhana ki la don ki khynnah kiba la hap ban prie kaba ktah na ka jingsma iwtung bad ka lyer sma iwtung kaba mih na ki Karkhana.
Kum ban bynrap, kane ka jingeh ka dei kawei na ka jingeh kaba khraw tam ha kitei ki thaiñ ha kaba la ju don ka jingpynpaw jingeh na ka liang ki bor skul na ka jingkthah jong ki jaboh ba mih na ki Karkhana, hynrei kane kam poi shaei shaei ruh na ka jingleh kyllut ki bor ba dei peit ka sorkar.
