Ha ka jingiphuh iphieng la pynkut ïa ka tamasa Lukha Festival

Khliehriat Rymphang 9: Ki nongïalam bad ki dkhot jong ka Sonapyrdi Tourism and Economic Development Society (STEDS) ba kynthup u President jong ka STEDS, u bah K.S.Suchiang, ki ai ka jingkhublei ïa baroh ki paidbah kiba la ïa wan ban ïa sakhi lang ïa ka tamasa Lukha Festival kaba lai kaba la pynlong ha ka 3 tarik bad 4 tarik mynta u bnai ha rud ka wah Lukha, ha Sonapyrdi, East Jaiñtia Hills District, ka thong jong ka Society ka long ban kyntiew ïa ka kam jngohkai pyrthei ha ka thaiñ, khamtam ban pynithuh sha ka pyrthei ïa ka jingitynnad ka wah Lukha bad ka Wildlife Sanctuary kaba don ha ka thaiñ.
Ïa kane ka tamasa la plie da u Principal jong ka Jaiñtia Eastern College Khliehriat, u Dr Phervision Nongtdu, kum u kongsan, u bah Minot Lapasam, kum u Symbud Kongsan, la ïa donlang ruh ki Professor na Jaiñtia Eastern College, u RD jong ka Star Cement Ltd, u Devander Bansal, ki rangbah shnong na ki shnong bapher bapher bad ki riew rangbah kiba la shah khot sngewbha.
Katkum u kyrwoh na u President jong ka Sonapyrdi Tourism & Economic Development Society (STEDS) u la pashat ïa ki jingkren ba shong sbai jong u Dr. P. Nongtdu, ba la kren kum u kongsan ha katei ka sngi “ U Dr Phervision Nongtdu, u la ong ba ka long kaba donkam shisha ban long kiba ïohi jngai, ban long kiba stad ban sumar , ban pynneh pynsah ïa ki jingdon jingem kiba don ha ka mei mariang, u la pynkynmaw ruh ïa ka mynnor, ba ha ki 30 snem mynshwa ki briew kiba na Khliehriat bad na kiwei kiwei ki jaka ki ju hiar shaduh Sonapyrdi ban bamja Hotel, namar ki ju sngewtynnad ban bam ïa ki dohkha ba la khwai na ka Wah Lukha, u kyntu ruh ïa ki ki nongkitkam jong ka Society ba ki dei ban don ka jingïadei jingmut, ka jing ïa tylli khnang ban dup lah ban pyntyllun shaphrang ïa ki kam jong ka society”
Kiba la ai jingkren ha katei ka ba sngi plie, ki kynthup ruh u Symbud Kongsan, u bah Minot Lapasam, u Professor, D. Siangshai( JEC), u Waheh shnong Sonapyrdi, u bah Edimon Lamare, u Secretary shnong Sonapyrdi, u bah Daiapherbha Lamare, u bah S. Lamare, Asstistant Waheh shnong Sonapyrdi bad u RD jong ka Star Cement, u Devander Bansal.
Ha ka jingïakop pyni thei bhabriew (Beauty peagent), ba la long myn ha ka 3 tarik, ïa ka nam lah duh Miss Lukha 2023 la ïoh rah da ka samla, Rimika Dkhar, kaba la rah ruh ïa ka prize da ka song pisa kaba T 30000 (laiphew hajar tyngka), ka samla jingieid-u-ai Timung, ka la rah ïa ka 1st Runners up, lem bad ka prize da ka khung pisa kaba T 20000 ( ar phew hajar tyngka) bad ïa ka 2nd Runners up, la rah da ka samla, Hakani Phawa, lem bad ka song pisa kaba T 10000 (Shiphew hajar tyngka). Ïa ka nam Best Cat Walk, la ïoh rah da ka samla, Firstlin Roy Kam bad ïa ka Miss Beautiful Hair, la ïoh da ka samla, Rortunate Mika Dkhar bad ïa ka Best Costome, la rah da ka samla, Rimika Dkhar, ïa ka nam, Miss Beautiful Smile pat la rah da ka samla, Hakani Phawa. Ha katei ka miet la pynshongshit ïa ki paidbah da ki jingtem sur DJ.
Ha ka 4 tarik pat, kaba dei ka sngi ba kut ka tamasa Lukha Festival, ka la don ka jingïaid kjat (Trekking), kaba la ïaid bad rung hapoh ka khlaw kyrpang jong ka Narpuh Wildlife Sanctuary, ba la wan ïa shim bynta lang ruh da ki dkhot ka NSS, na Jaiñtia Eastern College, Khliehriat, la ïalam lynti ïa kane ka treking da ki nongtrei jong ka tnat Wildlife. La don ruh ka jingïakop king lieng, ka jingïakop jngi um, ka Beach Futsal competition, Scuba diving, Painting competition bad kiwei kiwei ki jingialehkai. Ha ka por mynmiet naduh 8 baje mynmiet, la wan ban tem da ki kynhun nongtem ba pawnam jong ka jylla ki ‘Snow White’ na Shillong lem bad ka DJ night.
Ha ka miet jong ka 4 tarik, u rymphang, la wan ban pynhap pyrda noh ïa kane ka tamasa, Luka Festival, da u samla Marshal Biam kum u Kongsan bad u Manbha Kyndoh Dolloi Elaka Narpuh kum u Symbud kongsan, la ïa don lang ruh ka District Forest Officer, Wildlife, i kong N. Laloo, kum I nong shah khot sngewbha.