Khliehriat Rymphang 9 : U kyrtong jong ka party TMC, u samla Suni Bareh, uba ïakhun ïa kane ka MLA Election na ka 6 Khliehriat constituency, u la pynpaw shibun kiei kiei, kiba dei ki nongrim kiba u angnud ban trei na ka bynta ban tei ïa ka imlang ka sahlang, kata lada u jop bad poi sha ka thong, u la ong ruh ba u la jied ïa kane ka party (TMC) namar ba ka dei ka party kaba dang thymmai, ka bym pat don kano kano ka jingthoh bria bad kam pat don kano kano ka jingshah kynthoh.
U samla Suni Bareh, u la ong ba kum u kyrtong ïakhun election, u khlem leit sha ki paidbah jong ka constituency da ka pisa, hynrei u la leit sha ki nongshong shnong da ka jingieid bad jingshaniah bad da ka jingkyrmen ruh ba ki paidbah kin ai ïa u ka lad, da ka jingieid bad jingshaniah jong ki ba un poi sha ka thong.
Haba kren shaphang ka jinsghah ktah ki paidbah ka thaiñ, naduh ba shah khang ban tih bad shalan ïa u dewïong, da ka jingsngew diaw bad sngew khia mynsiem u la ong “Ngan ïathuh ïa ka jingshisha, ba ki don ar ngut ki longkmie kiba la wan sha ïing jong nga, ki la ïathuh ba kim ïoh ban bam ja la ar sngi, kane ka pyn pang ïa ka mynsiem jong nga ba tang u khaw ruh kim ïoh ban thied, te lada nga ïoh ka lad ka lynti, ïa kum kine ngan ïarap, ha kaba ïadei bad ka kam dewïong pat, nga ngam long kum kiwei ki kyrtong, ban shu kular ïa ki paidbah, hynrei, lada nga poi sha ka thong ngan wad ki lad ki lynti ba kumno ban plie ïa u dewïong”
Utei u samla, uba la ju bat teng ruh kum u General Secretary jong ka Jaiñtia Students Movement (JSM), u don ruh ka jingsngew sahnud, ha kaba ïadei bad ka jingdawa college sorkar hapoh East Jaiñtia Hills District, ba ka seng ka la dawa mynta la bun-bun snem, kaba ym pat shym la lah ban pyn urlong haduh mynta, u la ong ba ha ka por ba u dang don ha ka seng JSM, ki la ju wad ïa ki lad ki lynti ban wanrah ïa ka College sorkar hapoh district, hynrei mynta u la kynthih noh sha ka politik, da ka jingpyrkhat ba lada u poi sha ka thong, kan kham pynsuk ïa u ban ïakren bad ka sorkar ha kaba ïadei bad ka jingdawa College sorkar ha East Jaiñtia Hills District. “ha ka por ba ngi don hapoh ka seng, shisha ka jynjar, namar ngi hap pynlong da ki rally, ngi hap pynlong ki prokram ïakhih ruh ban dawa ïa ka College Sorkar, hynrei da nga poi ha ka thong kan kham pyn suk ban ïakren” pynpaw u samla S.Bareh.
U la ong ruh ba kane ka jingmih jong u kum u kyrtong ban ïakhun ïa kane ka election, ka long kum ka jingpynshlur bad ai mynsiem ïa ki para samla ba ki dei ban don ka mynsiem ban mih sha khmat ha kino kino ki rynsan.
