Poi ïashim bynta ki kyrtong MLA ka 2-Jowai sha ka Common Platform ka DS Khimusniang
Jowai, Rymphang 09 : Ki 5 (san) ngut ki kyrtong MLA na ka 2-Jowai Constituency kiba kynthup ïa u ma Wailadmiki Shylla (NPP), ma Allan K. Suchiang (BJP), ma Awhai Andrew Shullai (TMC), ma Daniel Dann (INC) bad u ma Moonlight Pariat (UDP) kila poi mynta ka janmiet ha Shnong Khimusniang na ka bynta ban ïashim bynta ha ka Common Platform kaba la pynlong da ka Dorbar Shnong Khimusniang, khnang ba kin ïoh ban pynsngap pynsngew ïa ki jingthmu bad ki kular elekshon jong ki sha ki paid nongshong shnong.
Ïa kane ka Common Platform la pynlong ha Indoor Sports Hall jong ka Dorbar Shnong Khimusniang kaba la sdang naduh ka por 7 baje janmiet, ïa ka jingïalang la pynïaid da u Waheh Shnong ma A. Lamare.
Baroh kitei ki kyrtong haba ai jingkren kiba pynsngew ïala ki jong ki nongrim ba skhem ba kin treikam na ka bynta ka jingbha jingmiat jong ka Constituency hi baroh kawei, shuh shuh kila pynsngew ïa ki jingeh kiba ka sor ka Jowai ka ïa kynduh ha kine ki sngi ba mynta da ka jingkular ban kin trei hok lada kin wan haka bor bad ban ai ka jingshakri kaba bha tam ïa ki paidbah.
La ïoh jingtip ba ïa kum kane ka Common Platform na ka bynta ki kyrtong la sdang ïa ka da ka Dorbar shnong Khimusniang bad ïa kane la pynlong tang shisngi khnang ba kan ym ktah ïa shnong ka thaw bad ban lait na ki jinghuri hura hapoh ka shnong.
Kren pdiang da u Asst. Waheh Shnong ma J.M Pohsngap katba ïa ki kyntien ai khublei la ïoh na u Secretary ma Wandamio Bamon