New Delhi, Rymphang 28 : Ka jylla Odisha ka la shah jied kum ka jylla kaba hakhmat eh ban kyntiew stet ïa ki kam ïalehkai ha ka Ri baroh kawei. Kane ka dei hadien ka lympung Odisha Open ka la long kaba seisoh bad mynta pat sa ka jingpynkhreh ban pynlong ïa ka FIFA U-17 Women’s World Cup.
Ka Odisha ka la ioh ïa ka khusnam Sportstar Aces Award ha ka Taj Mahal Palace ha Mumbai kaba long ha kane ka sngi Nyngkong. Ha kane ka sngi, u Myntri Rangbah ka jylla Odisha u Naveen Patnaik u la long u nongpynïaid bad nongpdiang ruh ïa ka khusnam na ka kti jong u rangïalehkai kriket ba kynsai ka ri u Sunil Gavaskar bad ruh na u Sureh Nambath, Editor ka The Hindu.
Haba kren ha katei ka jingïalang, u Myntri Rangbah u la ong ba ki sngewkmen haduh katta katta ba ki ioh pdiang ïa katei ka khusnam kaba long ka jingithuh ha ka jingïakhun ban kyntiew ïa ka jingïalehkai hockey ha kine ki khyndiat snem ba la dep. “Ha ki 15 bnai ba la dep ngi la lah ruh ban tei ïa ka stadium hockey kaba heh tam ha ka pyrthei. Ngi ngeit ruh ba ka jingpynlut na ka bynta ban kyntiew ha ki kam ïalehkai kadei ruh ka jingplie lad bad ka jingailad ïa ki samla bad ka lawei jong ki,” la ong u Myntri Rangbah.
Katei ka jylla kaba don ia ka stadium kaba paka tam ha Bhubaneswar, Cuttack bad Rourkela ka la kylla long ruh kawei na ki jylla ba bïang tam ki jaka ïalehkai ha ka Ri.
Hadien ba ka la jop ban pynlong ïa ka Odisha Open bad ruh mynta ïa ka lympung ïalehkai FIFA U-17 Women’s World Cup, ka Odisha ka la pyni ruh sha ka pyrthei ba ka la long ka jylla kaba biang tam ha ki lympung ïalehkai ha u snem 2022.
Tang ha u snem ba la dep, katei ka jylla kala lah ruh ban pynlong haduh 14 tylli ki lympung ïalehkai pohiing (National) bad ruh ki jingiakhun barri kynthup naduh ka badminton, football, hockey, athletics bad ruh ka basketball.
Ym tang katta, ka la kyrshan ruh bun bha ki nongïalehkai ha kaba ki la don haduh 33 ngut kiba mihkhmat ïa ka India kynthup naduh ki nongïalehkai ba kynsai tam ha ka hockey kum u Amit Rohidas, Deep Grace Ekka bad ka thei mareh ba pawnam ka Dutee Chand.
Ki la don ruh haduh 40 ngut ki nongïalehkai kiba la ioh ban khur takma ha ki lympung ïalehkai ha ka Ri katba 114 ngut pat kiba ioh ban khur takma ha ki lympung iakhun barri kaba pyni shisha ïa ka jingpynleit jingmut jong ka jylla ban kyntiew ia ki kam ïalehkai bad ruh ban kyrshan ïa ki nongialehkai.
Mynta, katei ka jylla ka la mang ruh haduh 1426.51 kur tyngka na ka bynta ban pynbïang lut pura ha kiwei pat ki jaka kiba dang hap ban pynbiang.
Kato katne na kitei ki prokram ki kynthup naduh ka jingwad ïa ki nongïalehkai ba kynsai ha ki 14 tylli ki jait jingïalehkai na baroh ki block haduh ka jylla, nangta san tyli ki jaka ai jinghikai kiba ïahap katkum ki kyndon jong ka FIFA, ka jaka ai jinghikai ha ka hockey bad ki jaka hikai jngi ha baroh ki distrik.
Lah ban kdew hangne ba ki dkhot jong ka Sporstar Aces 2023 ki kynthup ïa u nongïalehkai kriket bairm ka Ri u Sunil Gavaskar, kapten barim ka kynhun ïalehkai hockey ka ri u M. M. Somaya, u rangïalehkai chessba pawnam ka ri u Viswanathan Anand, kapten barim ka kynhun ïalehkai phutbol ka ri u Baichung Bhutia bad ruh u rangïalehkai bakhur takma ksiar na ka Olympic u Abhinav Bindra nalor ka Anjali Bhagwat bad ka Aparna Popat.
