Tang 75 % poi thep vote ha Meghalaya

Shillong, Rymphang 27 : Wat la ka jingïathep vote ha ka jylla ka long kaba ïaid beit ïaid ryntih khlem kino kino ki jingjia ba sngewsih, hynrei lada phai pat sha ka jingwan ki nongthep vote ki duna bha ban ïa ka election MLA 2018. Namar mynta ka sngi kiba poi thep vote ha baroh kawei ka jylla kat haduh ka 5 baje janmiet ki long 75 % na ki 21,40,453 ngut ki nongthep vote ha ki 59 tylli ki constituency katba ha u snem 2018 kiba poi thep vote ki long 86.9 %.
Ki don 369 ngut ki kyrtong kiba ïakhun sha kane ka election bad ki kynthei ki don 36 ngut. Ki nongthep vote shynrang ki long 10,58,929 ngut bad ki nongthep vote kynthei ki long 10,81,342 ngut.
Haba ïakren bad ki lad pathai khubor u CEO u bah F.R Kharkongor u la ïathuh “ Kat haduh ka por 5 baje kiba wan thep vote ki long 75 % hynrei kane ka lah ban dang kylla namar ka jingtip kaba thikna kan long haduh lashai mynstep. Ka daw ka long ba ki don ki Polling Station kiba ka jingïathep vote ka lah ban poi shaduh ka por 9 baje mynmiet ruh. Kiba kum kine ki Polling Station ki don kumba 400 tylli. Tangba tang kawei kaba sngew tynnad ka long ba ka jingïathep vote ka long kaba ïaid beit ïaid ryntih ha baroh kawei ka jylla”.
U la ïathuh ba ki don katto katne ki Machine kiba thut ha ka por ba sdang hynrei ïa kine la kylliang noh da kiwei bad kam don kano kano ka jingthut jong ka jingthep vote.
U CEO u la ïathuh ba ka la don ka jingpyrkhat ba ki lah ban don hynriew tylli ki polling station kiba lah ban don ka jingpynthut ha ka jingthep vote kiba ha Mawhati Constituency hynrei kine ruh ki ïaid beit da ka jignïarap ki pulit ka Assam bad ki pulit ka jylla khamtam ka jingïatrei lang jong baroh ar ki sorkar kata ka sorkar Meghalaya bad ka sorkar Assam. Kumta ki nongthep vote ha baroh kitei ki polling station ki la ïoh ban thep vote baroh shisngi khlem kino kino ki jingpynwit.
Haba la kylli kaei ka daw, u bah F.R Kharkongor u la ïathuh ba ki la ïoh pdiang ïa kawei ka video kaba uwei u MLA na Assam u la ken ba kito baroh kiba sah ha Assam kim dei ban leit thep vote namar un ym shah ïaki ban leit thep vote. U CEO u la ïathuh ba ka CEC ka la kular skhem ba kino kino kiba la don kyrteng ha ki Electoral Roll ha kino kino ki Polling Station yn ym don ba lah ban khang ïa ki ban leit pyndep ïa ka hok thep vote jongki.
“ Kumta kam shym la don kano kano ka jingpynwit mynta ka sngi bad ngi sngewnguh ruh ia ki bor ka sorkar Assam kiba la ïatrei bad ïarap ban peit ba kine ki nongthep vote kin ïoh ban leit hthep vote” ong u bah Kharkongor.
U CEO ula ïathuh ruh ïa ki jingeh ba ki nongpynïaid election ki hap ban mad haba leit sha ki polling station na ki jaka riat jaka ram, ki wah, ki khohruh khohram bad kiba kum kine ki don haduh 183 tylli. U ai khublei ïa ki bor pulit kiba la ïarap ban buh haduh 264 tylli ki Police Radio Stations ban pynthikna ba yn ïoh ban ïakren bad baroh ki nongpynïaid election.
Nalor kane la lah ruh ban buh ïaka temporary polling station ha Leoprosy Centre Nongpoh Constituency khnang ba kito ki nongpang kin ïoh ban ïashim bynta haka jingthep vote. U la ïathuh shuh shuh ba 91.8 % kiba 80 snem shaneng bad 95 % kiba don ki jingduna dkhot met ki la ïoh ban ïashim bynta ha ka jingthep vote.