Ka Exit Poll : Ap ka sorkar synrop ha Meghalaya yn jop bun eh ka NPP

Shillong, Rymphang 27: Hadien ba ki paidbah ka jylla mynta ka sngi kila pyndep ïa la ka hok ban jied ïa ki nongmihkhmat shaka ïing Dorbar Thawaiñ ka jylla, kala don ka jingbatai lypa ïa kaei ka resol kaba lah ban mih haka 2 tarik u Lber kaba dei ka sngi ñiew vote bad katkum ki Exit Poll la kdew ba ka NPP kan dei ka seng ka ban jop bun tylli ki Seat ha ka Election MLA 2023.
Katkum ka Exit Poll la kdew ba u Conrad K. Sangma uba ïalam iaka National People’s Party (NPP) kan dei ka seng kaban jop haduh 20-26 tylli ki Seat bad ka don ïa lad ba kan bteng ban ïalam biang ïaka sorkar synrop lang ha ka jylla namar kumba ka par ka NPP kan ym lah ban jop palat ïaka 31 ngut ban thaw sorkar marwei bad yn hap ban thaw ïa ka sorkar synroplang.
Ka seng kaba lah ban wan Baar kadei ka Trinamool Congress (TMC), kaba lah ban jop haduh 8-14 ngut ki kyrtong.
Ha ka jylla Meghalaya ki don 60 tylli ki Constiyuency bad ban thaw ïaka sorkar marwei donkam ban jop 31 ngut ki MLA.
Ka jingpynlong ïaka elekshon mynta ka nsgi kala long tang ïa ki 59 tylli ki Constituency namar ïaka Sohiong ym shym la pynlong namar ka jingkhlad noh jong u Bah HDR Lyngdoh uba long u kyrtong ka UDP ha ka 20 tarik mynta u bnai bad ka ECI kam pat pynbna ïaka tarik ban pynlong ïa ka elekshon ha kane ka Constituency.
Ka Election Commission of India (ECI) kala khang pyrshah ban pynmih ïa ka Exit Poll haduh ka 7 baje mynmiet jong ka 27 tarik u Rymphang.
Kat kum Exit Poll kaba la leh da ki kynhun bapher kum ka India Today-My Axis India, Zee News-Matrize bad Peoples Pulse-Big TV bad Times Now-ETG.
Katkum ka Peoples Pulse-Big TV Exit Poll: Ka NPP ka lah ban ïoh 17 – 26 seat, ka TMC kan 10 – 14 seat, UDP kan ïoh 8 – 12 seat, ka BJP kan ïoh 3 – 8 seat, ka Congress kan ïoh 3 – 5 seat, ka VPP 1 – 2 seat, ka PDF 1 – 2 seat, HSPDP 1 – 2 seat, ka GNC 0 – 1 seat bad kiwei kiwei 1 – 2 seat.
Katba ka Zee News-Matrize kala buh ba ka NPP kan jop 21-26 seat, ka BJP 6-11 seat, 8 – 13 ïa ka TMC bad 3-6 seat ïaka Congress bad 10-19 seat ia kiwei pat.
Ka India Today-My Axis India kala buh ba ka NPP kan jop 18-24 seat, ka Congress kan ïoh 6-12 seat, ka BJP kan ïoh 4-8 seats bad kiwei kiwei kin ioh 17-29 seat.
Na ka liang jong ka TimesNow-ETG kala buh ba ka NPP kan ïoh 18-26 seat, ka TMC bad ka UDP kin ïoh mar 8-14 seat bad 3-6 seat ïaka BJP bad ïa kaba tam yn leit sha kiwei pat ki seng saiñ pyrthei bad ki kyrtong shimet.
Hynrei kitei ki jingbuh ne jingïathuhlypa jong ki Exit Poll kim long kiba paka ne thikna hynrei ki ai pat ïa ka buit ban sngewthuh kumno ka result kan long haka 2 tarik u Lber.
Ki jinglap bad ki Daw
Ka Peoples Pulse–Big TV kala pynlong ïaka Exit Poll haka 27 tarik u Rymphang haki 15 tylli ki Constituency da kaba pynshong nongrim katkum ka Probability Proportional Methodology (PPS) ha kaba la jied ïa ki 4 tylli ki jaka thep vote ha kawei ka Constituency.
Na kine ki jaka thep vote la shim ïa ki ‘Sample’ bad na kawei ka Jaka Thep Vote la shim haduh 20 tylli ki Sample bad baroh ki sample kiba la lum ki long 1200 tylli ban tip ïaka jinglong jingman ha kaba ïadei bad ka jinglong riewlum, niam bad ka rta, ka jingailad ban don bynta lang ki kynthei bad shynrang.
Na ka bynta ka seng NPP, ka Exit Poll kala pynpaw ba kawei na ki dawbah jong kane ka seng, kadei ba ki paidbah ki ñiew burom ïa u (L) PA Sangma uba long u nongseng jong ka NPP bad udei uba ki paidbha haduh mynta ki dang burom bha khamtam ha rilum Grao bad ka ïing ka sem ka jongu kadei kaba lah bha ban pynkohnguh bad ïoh ïa ka jingkyrshan na ki paidbah ka rilum Garo.
Lada dei ba kam don ka jingkynnoh halor ka kam bamsap kaba long kawei na ki ishu, ka seng NPP kala dei ban nang khlaiñ shuh shuh.
Ka Trinamool Congress (TMC) kadei ka kynhun jong ki 12 ngut ki MLA kaba la ïalam da u Myntri Rangbah barim ka jylla u Dr. Mukul Sangma ïa kaba la ñiew ïa u kum uta u nongïalam ba radbah uba ar hapoh ka rilum Garo hadien jong u (L) PA Sangma.
U kren bun jait ki ktien ha kaba u lah ban ïadei bha bad ki jaidbynriew bapher bapher. Hynrei ka jingkynnoh ba ka seng TMC kadei kaba nabar ka jylla kala ktah ïa ka dur ka dar jong ka seng bad kam shym la lah ban suhthied bha hapoh ka rilum Khasi bad Jaintia kiba don haduh 36 seat.
Ha kaba ïadei bad ka BJP, la shim ba kadei ka seng kaba pyrshah ïa ki Khristan bad ki kyrtong ka BJP kin jop ïaka elekshon ym ha ka kyrteng jong ka seng hynrei kadei hi na ki kam shimet kaba ki trei kum ki kyrtong bad na ka jingpawnam ka jong ki.
Ka jingïakhun hapoh rilum Garo kan long hapdeng ka NPP bad Trinamool Congress katba ha rilum Khasi bad Jaintia Hills kaba don 36 seat ka jingïakhun ka long hapdeng bun tylli ki seng saiñ pyrthei kumba ju long ha ki elekshon ha ki por bala dep.
Haba peit kyllum lang haka jylla baroh kawei, ka jylla Meghalaya kan ym ïoh ïaka seng kaban thaw sorkar marwei hynrei kan shong ha ka jingïapynbeit jong ki seng saiñ pyrthei bapher ha kano ka dur kin thaw ïaka sorkar synroplang hadien bala dep pynbna ïaka result haka 2 tarik u Lber.