Shillong, Rymphang 27 : Ka Iewduh kaba dei ka ïew kaba heh tam ha nongbah Shillong ha ka sngi Nyngkong ka la kynjah jar jar ha kaba jan baroh ki dukan ki la khang khyrdep lut bad jan baroh ki basa ki kynjah lut jar jar.
Ym tang katta, wat ka Motphran kaba ju dap da ki kali kumjuh ki nongleit nongwan ruh hynrei hynne ka sngi ka la kylluid war war. Nalorkata, ka surok bah naduh Motphran ter ter shaduh Khyndailad ka la sakhi lang ïa kajuh ka jinglong jingman ha kaba baroh ki dukan heh bad dukan rit ki khang lut.
Halor kane, haba ïoh ban ïa kren bad katto katne ki dukan rit kiba plie ha ki katto katne ki jaka ki la ïathuh ba lehse ka daw ka jingkhang dukan ka lah ban dei ba ki nongshong dukan ki leit ban thep vote.
“Kane ka pynpaw ba imat baroh ki leit ban thep vote lane ki thait ban wan iew namar ki artatien ïoh ym don iew don hat,” ong i Kong ba die kwai ha ki bynta jong ka Motphran. Katkum ka jingong jong i, kane ka jingkynjah ka la neh kumjuh naduh ka por mynstep tad haduh ka por 4:00 baje janmiet. Ym tang katta i ïathuh ruh ba wat ka die ka thied ruh ym don satia namar ka jingduna ki nongleit nongwan.
Na ka liang ki kali kamai pat kiba don katto katne tylli ha Motphran ki la pynpaw ba man ka sngi, jan man ka minit ki don beit ki briew kiba mih na Motphran ban leit sha ki bynta jong ka Khyndailad, IGP, Malki ter ter wat shaduh Dhanketi ne Laitumkhrah ruh. Hynrei ha kane ka sngi, ki la ong ba ym don satia ki paidbah kiba leit wat tang ha Khyndailad ne IGP.
“Imat ba dei artad ba ka sorkar ka ai shuti thep vote kumta naduh ki nongtrei sorkar haduh ki jaka pule ki khang lut,” u la ong.
Lah ban kdew hangne ba ki la don haduh kumba 75 persen ki nongthep vote kiba la poi sha ka jingjied ïa ki nongmihkhmat ba thymmai ha ki 59 tylli ki constituency jong ka jylla hynne ka sngi, kata lait noh ka Sohiong.
