Hapdeng ki Ummat kthang, la rah noh ïaka met jong ki 6 ngut ba khlad haka jingjia aksident ha Umbang Sumer

Nongpoh, Rymphang 27: Hapdeng u lyoh badum bad ki ummat kthang ïa kiba ïeid ba thoiñ bad ki bahaïing ha sem, ïaka met ba sah jong ki 6 ngut kiba la khlad noh haka jingjia aksiden hynnin ka sngi ha Umbang Sumer ba kynthup ruh 3 ngut ki Sister jong ka Fatima Convent, Barama, u phadar, u nonghikai lem bad u nongñiah ka kali Bolero la rah noh mynta ka sngi sha Bongaigoan Diocese ban pyndep ïaka jinglehñiam ba khatduh hadien bala pyndep ïaka Post Mortem ha Civil Hospital Nongpoh.
Kitei ki 6 ngut kiba la khlad noh ki kynthup ïa u Rev. Fr. Mathew Das, uba dei u Parish Priest jong ka Barama Parish, Sr. Milagrine Dantes, Sr. Pramila Tirkey, Sr. Rossie Nongrum kiba dei ki Sisters jong ka Fatima Convent, u Mairan Ranger ba dei u nonghikai jong ka St. John’s HS School, Barama bad u Sanjay Swargiary uba dei u nongñiah jong ka Bolero ba ki shong, kiba la mad ruh ïaka jingjia aksiden hynnin ka sngi u Blei haka shnong Sumer Umbang, Ri-Bhoi District hadien ba kawei ka trok kit dewbilat kala rat ïaka Bolero kaba ki shong bad ban ruh ïaka kali haduh ba kila khlad hajuh ha katei ka jaka bad mynta ka sngi naka liang ki doctor jong ka Civil Hospital Nongpoh, ki la ïoh ban aiti noh ïa kitei ki met ïap sha ki bahaïing hasem ha ryngkat bad ki sister bad father kiba la wan ban synran lang.
Ïa kitei ki riew ñiam kiba kynthup ïa u Rev. Fr. Mathew Das yn pyndep lashai ka 28 tarik Rymphang da kaba mass Christ Light of the World Cathedral Church Bongaigaon bad yn tep ha St. Jude’s Prayer Tower, Kajalgaon naduh kapor 2 baje janmiet bad ïa kitei ki 3 ngut ki sisters yn pyndep donburom lashai ka sngi ha ka por 10 baje mynstep ha St. Paul’s Pastoral Center Rangia, ïaka met jong nonghikai Mairan Ranger yn rah noh sha jaka sah jong u ha Darjeeling, bad Sanjay Swargiary sha jaka sah jong u ha Bongaigaon.
Naka liang u Fr. Peter Syiemlieh Parish Priest jong ka Nongpoh Parish u la ong ba kum ki paid riew ngeit ka Balang Katholik ki ïam briew bad dap da ka jingsngewsih kaba khraw halor katei ka jingjia ba khlem poi pyrkhat ba u Blei u la shim noh ïa kitei ki 6 ngut ki mynsiem briew bad pynpaw ruh ka jingsngewnguh kaba khraw ïa broh kiba la don bynta ban ai mynsiem ban pyntngen, naduh ki Father ki Sister, ki Doctor ki nurse jong ka Civil Hospital, ki bor pulit jong ka Ri-Bhoi kiba la trei shitom ban pyndep ïaka kam haka por ba biang, ki nongmihkhmat ka Jirang bad Nongpoh kiba la pynbiang ïaki Ambulance, u Thomas Pulloppillil Bishop ka Bongaigaon u ba la phah ïaki sister bad ambulance mar sien tip halor katei ka jingjia, bad kumjuh ïaki paidbah jong ka dong Ri-Bhoi kiba la wan ban ai mynsiem ha kum kane ka por ba sngewsih.
Naka liang u Father Peter Syiemlieh u phah ruh ïaka kyrwoh sngewlem sha baroh ki bahaïing ha sem bad kiba ïeid bathoiñ jong kitei 6 ngut ba u Blei un don ryngkat bad ki ha kum kane kapor ka ba sngewsih kthang bad u Blei un ai ka jingjahthaid ka bym jukut ïa kitei ki 6 ngut ki riewngeit jong ka balang katholik kiba la duh noh ïaka mynsiem.