Sngew skhem u Bah Prestone ban wanphai biang ha ka sien kaba san kum u MLA ka Pynursla

Pynursla, Rymphang 27: U MLA ba mynta ka Pynursla uba dei ruh u Symbud Myntri Rangbah ka jylla u Bah Prestone Tynsong ha ka sngi Nyngkong u la pynpaw ïa ka jingsngew skhem ba un wanphai biang kum u MLA ka Pynursla ha ka sien kaba san.
Haba kren bad u Mawphor hadien ba u la dep ban thep ïa ka vote jong u, u Bah Prestone u ong ba ka jingjop ha kane ka kynti ka la long kaba thikna na ka bynta jong u bad un tam ruh da bun hajar ïa u kyrtong ban wan ba-ar.
“Shibun ki kam kiba nga la leh kum u MLA ka Pynursla ha kine ki 20 snem kiba la leit bad dei ki kam kiba nga la leh kin long hi ka daw ba ki paidbah ka thaiñ kin bynshet biang ha nga ïa kane ka lyngkor bad ngam don tang shisapit ruh ka jingartatien ba ngan jop beit bad ka jingjop ruh kan long da ka jingtam kaba bun bun hajar vote ïa u kyrtong uban wan ba-ar,” ong u Bah Prestone.
Haba kylli ïa ki kam kiba u la leh ha kine ki 20 snem kum u MLA, “Ngam lah ban jer namar ki la bun than lada thoh da ka kot ruh ka la bun volume bha bad u paidbah hi ka thaiñ u la sakhi ïa kane hyrnrei ki don ruh ki kam kiba dang sahteng kiba ngan pynleit jingmut ha kine ki san snem kiban wan,” u la ong.
“Kawei kaba nga kwah ka dei ban pynjanai ïa ka Civil Sub-division, ban kyntiew ïa ka Pynursla CHC sha ka Sub Divisional Hospital bad ban pynkha sa ka laiñ Commorce bad Science ha Riwar College khnang ban lah ban ai jingshakri kab paka ïa ki paidbah ka thaiñ,” u la bynrap.
Lah ban kdew hangne ba u Bah Prestone Tynsong u MLA ba mynta ka Pynursla u la jop la saw sien kum u MLA na ka thaiñ Riwar ha kaba u la jop nyngkong eh ha u snem 2003 nangta ha u 2008 na Lyngkyrdem Constituency na ka party Congress bad hadien ba la phiah thymmai ïa ki constituency ha kaba ka Lyngkyrdem bad ka Nongshken Constituency ka la kylla long noh tang kawei ka Constituency kata ka Pynursla ha u 2013 bad u la jop biang ha kane ka kynti ruh na ka Congres bad kumjuh hadien ba u la ïakhun noh naka NPP ha u 2018 u Bah Prestone u la jop biang kum u MLA.
Haba ïakren bad u Bah Anthony Kongewang u kyrtong ka UDP u la pynpaw ba um kob lupa ba un jop namar dei tang u paidbah uba tip ïano u kyrshan ban phah sha ka dorbar kum u MLA ka thaiñ.
“Ngam ong lupa ba ngan jop hynrei ngin ap keiñ ïa ka 2 tarik namar ka sur u paidbah kan shai ha katei ka sngi hynrei na ka liang jong ngi ngi la ai ïa kaba bhatam ban kynjoh sha ka thong bad u paidbah hi un rai ïano u ibit,” u la ong.
“La seng ïa ka VPP namar ka jingdonkam jingkylla ha ka jylla bad nga ngeit ba kane kan phalang ha ka 2 tarik. Lada nujor ïa ka campain jong kiwei ki party bad ka jong ngi ruh kan pher bha. Ngim don pisa ruh ban ai bai sngi ne khawai sha ne khawai ja ïa ki nongthep vote. Ki samla bad ki nongshnong shnong ka thaiñ kiba sah ha kiwei ki bynta ka jylla bad ha sor lada ki wan ban thep vote ban kyrshan ïa ngi ruh ki tip hi ïa ka bai leit bai wan ngim don pisa kum kiwei ban siew bai kali bad pynkreh bos bad kane ka la dei lupa ka jingjop kaba don burom bad ngam artatien ba kiba bun ki samla bym don spah da kane ka nuksa kaba ki la ïohi kiba don ka thong ban shakri kin nud ban mih shakhmat ban tyrwa sha u paidbah,” ong u Bah Manbhalang Thabah u kyrtong ka VPP.
Shuh shuh haba ïakren bad u Bah Edmund Khongngai u kyrtong ka AITC u la ong, “Nga don ka jingïohi ba ki paidbah ki la angnud shisha ïa ka jingkylla ha kane ka kynti kaba mynta bad nga ngeit ki la vote ruh da kata ka nongrim ban wanrah jingkylla ai ngin ap ïa ka rai kaba u paidbah u la shim kaba ngin sa ïohi ha ka sngi ñiew vote.”