Pynbna u Myntri ka tnad Sports ka jylla ïa ka sienjam ba saw jong ka STAR Talent Identification Programme

Shillong, Risaw 28: U Myntri ka tnad Sports jong ka sorkar jylla Meghalaya u bah Wailadmiki Shylla, ha ka 27 tarik Risaw u la pynbna paidbah ïa ka sienjam kaba saw jong ka STAR Talent Identification Programme (TID-4) kaba la plie ha SAI STC, Shillong.
Kane ka prokram ba la pynlong da ka Meghalaya State Olympic Association (MSOA) ha ka jingïatrei lang bad ka tnad Sports kumjuh ruh bad ka Sportality Pvt. Ltd. (kaba pynbit pynbiang ïa ki kor jingthew ban bishar ïa ki nongïalehkai), ka thmu ban bishar bñiah ïa ki 13,000 ngut ki nongïashim bynta ha baroh 12 tylli ki distrik, kiba kynthup ïa 10,000 ngut ki nongïalehkai khynnah skul bad 3,000 ngut ki nongïalehkai kiba hap hapoh ka jingpeit jong ka association.
Kiba la don lang ha ka jingïalang plie ki kynthup ïa u bah Alertson Nongbri, MCS, Director, bah P. B. War Nongbri, Deputy Director, Directorate of Sports and Youth Affairs; u bah John F. Kharshiing, Working President ka MSOA; bah Dipshon Ryntathiang, Chairman, Podium Committee, MSOA; u Vikram Malik, Co-Founder, Sportality Pvt. Ltd.; Colonel Vinay Kumar, Director Recruiting, Recruiting Officer (Headquarters), Shillong; Lieutenant Colonel S. Marbaniang (Retd.); bad ki nongkitkam jong ki synjuk ïalehkai bapher bapher.
Haba ai jingkren ha ka jingïalang, u bah Wailad u la ong, “Ka jingthmu kam dei tang ban pynmih ïa ki nongïalehkai na ka bynta ki lympung hapoh ka jylla bad ka ri, hynrei ban sei ruh ïa ki nongïalehkai Olympic”.
U la bynrap ba ki nongïalehkai kiba shah jied na ka bynta ka Super Elite Programme kin ïoh ïa ka jingkyrshan ba pura kiba kynthup ïa ka jaka sah, ka jingpule, ka jinghikai bad ka bam.
Haba pynpaw ïa ka jingkyrshan kaba kham heh ïa ki nongïalehkai, u la ong ba hapoh ka Meghalaya Outstanding Sports Persons’ Direct Appointment Policy, ki nongïalehkai kiba jop takma na ka bynta ka Jylla ha ka kyrdan jong ka ri, Asian Games, lane ka Olympic bad Paralympic kin ïoh kam beit beit na ka sorkar khlem da ïakhun ïa ki eksamin.
Ki nongïalehkai mynta kin pynkhreh ban ïaid lyngba ïa ka Prokram Elite Pathway (EPP), kaba ai ka jinghikai ba la buh ryntih bad ka jingbishar kaba bñiah, bad nangta ka Super Elite Pathway Prokram (SEPP), kaba pynleit jingmut ha ka jingpynroi ïa ka sap bad ka jingpynkhreh ïa ki lympung.