Ka long kaei kaei kaba itynnad bad ihun ban ïohi ba ka jylla Meghalaya lehse ha ka sien ba nyngkong eh ka la lah ban pynlong ïa ka election kaba ïaid beit ïaid ryntih khlem da don kino kino ki jingjia ba sngewsih, kum ki jingïashoh ïadat, ki jingpynjulor ïaki EVM, ka jinghap ban thep vote biang kumba ju long ha ki por ba la leit noh.
Ka jingïaroh ka long nyngkong eh sha ki paidbah kiba la pynpaw ïa ka jingstad bad jingshai jongki namar wat hapdeng ki jingïashad ïa kmen bad hadien ki jingïakawang ktieh jong ki kyrtong na rynsan hynrei kane kam shym la pynlong ïa ki paidbah ban ïa khluit wat haba ki ïa kynduh smam mar khmat ha ka por ïa ïaid rally ruh. Nalor kata ka jingïaroh kan leit ruh sha ka tnad election kiba la shim khia ban pynshai bad pynsngewthuh sha ki paidbah ïa ka jingkordor jongka election bad ka vote jongki. Dei na kane ka daw ba sa poi ka jingthep vote shaduh ka 85.25 % ha ka jylla wat la khlem pat da ïoh kheiñ lang ïa ka Sohiong Constituency namar ka election ha katei ka constituency kan dang long kham hadien namar ka jingkhlad noh ba kyndit jong u kyrtong ka UDP u bah HDR Lyngdoh.
Nalor kane kaba kham kongsan kaba dei ban ïaroh ka long ïa ki bor synshar district bad ki bor pahara jongka sorkar jylla bad sorkar pdeng kiba la pyrkhing bha ïa ka rukom pahara ban khanglad ba kino kino ki jingjia kin ym ïoh lad ban jia.
Hynrei ka jingkyntu kyrpang ïaki paidbah lei lei ka long ba kim dei ban ïaleh shongshit hadien ka jingmih ka result ha ka 2 tarik namar ha ka jingïaleh ka don ka jingjop bad jingrem kumta wat lada uta u kyrtong uba ki kyrshan ne ka kyrtong kaba ki kyrshan ka rem ruh kim dei ban ïaleh shongshit ban ïashoh ïadat namar kine kiei kiei kim poi shano shano ruh. Ki paidbah ki dei ban kynmaw haba uno uno u kyrtong u la shah jied kum u MLA ka mut u dei u MLA jong baroh ym tang jong kito kiba pynjop ïa u. Ka kamram jongu ka long ban shakri salonsar khlem da peit shilliang khmat ïano ïano ruh.
Kumta khnang ban ym ïadon ka jingïabuh khoh kynmaw ban ym ïaleh shongshit ne ïashoh ïadat ha ka 2 tarik hadien ba la mih ka result. Lada jop ïashad kmen bad lada jia ba shah rem ruh leit phai sha la ïing da kaba jai jai ym ban thaw kino kino ki jingkulmar.
Kumba la ïalong baroh shi katta ban shu ïa shad ïakmen beit ha la ki sur jingrwai jong ki kyrtong ba ïa kyrshan kumta kane ka mynsiem ka dei ban ïai bteng bad ai ba ka jylla Meghalaya kan long ka nuksa ïakiwei ruh namar lehse kiwei kiwei ki jylla kim long kumba long ha kane ka jylla ban ïashad da ki paidbah ha ki madan ba long rally bad kynthei bad shynrang. Kane ka rukom ïashad kmen ha ka por election ka la kren briew sha kiwei kiwei ki jylla ka ri India namar haba ki ïohi na ki social media ki i phylla haduh katta katta ba kam don kano kano ka jingkulmar wat la ïashad kmen bad kynthei bad shynrang ruh. Kumta bat ïa kane ka burom bad ka akor kaba bha tam hakhmat kiwei.
