Sha ka sorkar kyrpad u MLA Jirang ban pynsted ki lad jingïarap sha ki lanot eiriong ha thaiñ Jirang

Nongpoh, Ïaïong 01: Kumba bun tylli ki longïing ha ki shnong ba hap ha ka Jirang Constituency ki la shah ktah jur bad don ruh kiba la kylla khlem ïing khlem sem na ka jingwan lynshop ka erïong bajur hynnin ka janmiet jong ka sngi u Blei, u MLA ka Jirang Constituency, u Bah Sosthenes Sohtun u la phah ïa ka jingkyrpad kaba jur sha ka sorkar jylla ba kan pynsted ïa ki lad jingïarap na ka bynta kito ki longïing kiba la shah ktah jur.
Kum ban pynkynmaw, hynnin ka janmiet kiba bun ki shnong ba hap ha ka Jirang C&RD Block ki la shah ktah jur ha ka erïong, kaba dei hadien ba ka eriong bajur ka la wan ban lynshopki ban pynjulor naduh ki ïing ki sem bad ruh wat ki jingthung jingtep jong kiba bun tylli ki shong ha ka thaiñ Jirang.
Haba la ïa kren bad ki Nongtho Khubor, u MLA ka Jirang u Bah Sosthenes Sohtun u la pynpaw ïa ka jingsngewkhia kaba jur halor katei ka jingjia ba sngewsih ba ka eriong erngit ka la wan ban lynshop naphang ïa ki ïing ki sem bad ruh ki jingthung jingtep kaba la long ka jingduhnong kaba khraw ïa kito ki lanot ba la shah ktah bad kaba kham sngewkhia ka long ba la don ruh ki longïing kiba la shah ktah jur ha kaba ki la hap ban riehtngen shipor ha ki ïing Dorbar bad ki skul, kaba dei hadien ba ka eriong ka la pynjulor ïa ki ing ki sem jongki.
U la ïathuh ruh da ki phew tylli ki shnong kiba la shah ktah hapoh ka Jirang Constituency kiba kynthup kum ka shnong Pamumsylliang, Umshalini, Rani, Gonpati, Jalpaham, Matang, Jirang, Umsohpai bad kiwei kiwei ki shnong kiba la pyntip bad kiba la ioh ban ïa kren lyngba ki telephone.
U la pynpaw ruh kaba sngewkhia ka long ym tang ba ka eriong ka la pynjulor lut ïa ki ïing ki sem bad ka eriong ka la pynjulor naduh ki diengkwai, ki diengjri (rubber) bad kiwei kiwei ki jingthung jingtep kiba la ktah shisha ïa ki longïing kiba la ngat ha kane ka lanot eriong.
Kum u Nongmihkhmat paidbah u la ïathuh ruh naduh hynnin ka sngi tang mar ïa ioh jingtip u la dep ban kren naduh u BDO ka Jirang Block C&RD Block kiba la phah ïa ki briew ban leit jurip ryngkat bad ma u kum u Ophisar bad ruh u la kren sha u Deputy Commissioner ka Ri Bhoi ba un shim khia khamtam ban pynpoi ïa ki lad jingïarap sha kaba kham kloi sha kito ki lanot kiba la shah ktah jur.
Shuh shuh, u la ong ruh namar ka jingsngewkhia kaba jur halor kane ka jingjia ba sngewsih ïa kiba bun ki longing longsem, kum u nongmihkhmat paidbah u la pyntip ruh sha u Symbut myntri rangbah ka jylla, u Bah Prestone Tynsong ba ka sorkar jylla kan pynsted ban pynpoi ïa ki lad jingïarap (Relief Fund) sha kito ki longing ba shah ktah jur bad ruh ba ka sorkar kan pyrkhat kyrpang ba kan nym ktah ïa kito ki longïing kiba la duh ïa ki ing ki sem na ka jingwan lynshop katei ka eriong bajur, u la bynrap.