Na ka bynta ka MP ilekshon 2024, wan jngoh ki EO ha South West Khasi Hills District

Mawkyrwat, Ïaïong 01: Ki nongkhmih ne ki Expenditure Observers (EO) na ka bynta ka ilekshon sha ka Lok Shabha ka ban sa long ha une u bnai na ka bynta ka 1- Shillong (ST) Parliamentary Constituency ba kynthup ïa u Satyapal. S. Meena, IRS bad u Kamlesh Kumar, IRS mynta ka sngi ki la wan jngoh ïa ka South West Khasi Hills District, Mawkyrwat ryngkat ka jingpynlong jingïalang ha kamra jong u District Election Officer, Mawkyrwat ban khmih bniah ne pynkhreh ïa ka jingtreikam jong ki komiti bapher bapher na ka bynta ka ilekshon Lok Sabha Parliamentary Elections, 2024.
Ha kane ka jingïalang, u Satyapal. S. Meena, IRS u la ai ka jingbthah kaba shai ha kaba ïa dei bad ki bynta ne ki kam ba dei ban leh ha kaba ïa dei bad ka kynhun ba dei peit ïa ka Expenditure Monitory ha kaba u la kyrpad ïa u Assistant Expenditure Observer (AEO) ban pynbit pynbiang ïa ki report ha ka por ba biang.
Ha kane ka sngi ka la don ruh ka jingïaphylliew bad ki Nodal Officers jong ki kynhun bapher bapher ha kaba ïa dei bad ka jingpynkhreh bad ka kam jong ki kynhun ba dei peit ha kane ka ilekshon kum ban peit ïa ki jingpyndonkam pisa, kyiad namar ka aiñ ne ki hukum ka Model Code of Conduct (MCC) bad ka jingpynlut jong ki kyrtong bad ki party bapher bapher.
U la ong ruh ba ka donkam na ka bynta kine ki kynhun ban ïathuh ne pyntip ha u Deputy Commissioner ne Nodal Officer lada don kano kano ka jingpynkheiñ ïa ka MCC lane kino kino ki jingeh ba ki ïa kynduh.
Ha kane ka jingïalang la ïadonlang u bah T. Lyngwa, IAS, District Election Officer, South West Khasi Hills District, u bah L.T. Tariang, MCS, Assistant Returning Officer (ARO), South West Khasi Hills District bad kiwei.